سەردار هیتوتی
لگوره‌ى وان داتایێن كو به‌ریا چه‌ند رۆژان كه‌ناله‌كێ راگه‌هاندنێ ل كوردستانێ به‌لاڤكرى: ل هه‌رێما كوردستانێ 6758 قوتابخانه هه‌نه كو مێژوویا ئاڤاكرنا پتریا وان بۆ به‌رى 50 سالان ڤه‌دگه‌ریت، ژ ڤێ هژمارا قوتابخانه‌یان زێده‌ترى 3000 ژ وان پێدڤى ب نویژه‌نكرنێ هه‌نه دگه‌ل پێدڤیا كه‌رتێ په‌روه‌ردێ ب 2000 قوتابخانه‌یێن نوى.
وى كه‌نالى دایه دیاركرن كو ل هه‌رێما كوردستانێ 1800230 قوتابى هه‌نه، و ل سه‌ر ده‌ستێ 150820 ماموستایێن دامه‌زراندى و 33000 ماموستایێن وانه‌بێژڤه دهێنه په‌روه‌رده‌كرن.
ئه‌ڤه د ده‌مه‌كى دایه كو ل 150 قوتابخانه‌یێن هه‌رێمێ سێ ده‌وامى هه‌یه و ل پتریا پولێن خاندنێ زێده‌ترى 45 قوتابى دناڤدانه.
ره‌وش ب ڤى ئاوایى یا د مه‌ترسیێ دا، چونكى نڤشێ بهێت دێ وه‌كى نڤشێ ڤان سیهـ سالان په‌روه‌رده بیت بیێ كو تشته‌كى ژ ته‌كنولوژیایێ بزانن و د ناڤا ژینگه‌هه‌كا ژ هه‌ژى دا بهێنه په‌روه‌رده‌كرن، ئه‌ڤه ل جهێ خۆ، لێ ل قوتابخانه‌یێن ئه‌هلى هه‌ر تشت بۆ قوتابى هاتیه به‌رهه‌ڤكرن و چینایه‌تى و پله‌به‌ندیا مرۆڤ و قوتابیان وه‌كى چاڤێ رۆژێ یێ دیاره.
بەری دوو رۆژان، ل سلێمانیێ 100 قوتابی دهێنە رەوانەکرن بۆ نەخۆشخانێ ژ بەز سکچوونێ و دلرابوونێ و سەرێ دوو قوتابیێن هەڤلێرێ ژی شکەست دەما کو پەنکێ هەوا ڤێکەفتی و چ نەمابوو دیوارێن قوتابخانەکا سێمێلێ ل دهۆکێ ب سەر قوتابیان دا بکەڤیت.
ئایا نڤشێ نوى، ئه‌وێ پتریا هه‌ژار و به‌له‌نگاز و سوته‌مه‌نیێن وه‌لاتى بخوڤه دگرن، دێ شێت ڤێ ره‌وشێ قه‌بیل بكه‌ت و به‌رهه‌ڤ بیت بۆ هه‌ر جوره قوربانیه‌كێ؟
