سه‌رۆكێ حكومه‌تێ دگه‌ل ژماره‌كا وه‌به‌رهێنه‌ر و خۆدانكارێن زاخۆ كۆمبوو

سه‌رۆكێ حكومه‌تا هه‌رێما كوردستانێ راگه‌هاند، ئه‌و دگه‌ل ژماره‌كا وه‌به‌رهێنه‌ر و خۆدانكارێن سنۆرێ ئیداره‌یا سه‌ربه‌خۆ یا زاخۆ كۆمبوو.

سه‌رۆكێ حكومه‌تا هه‌رێما كوردستانێ مه‌سرور بارزانى ل سه‌ر ئه‌كاونتێ خوه‌ یێ فه‌یسبۆكى دیاركر، ئه‌ڤرۆ دگه‌ل ژماره‌كا وه‌به‌رهێنه‌ر و خۆدانكارێن سنۆرێ ئیداره‌یا سه‌ربه‌خۆ یا زاخۆ كۆمبوو، و سوپاسییا وان بۆ هاریكارییا دگه‌ل حكومه‌تا هه‌رێما كوردستانێ كر و دووپاتكر، حكومه‌تا هه‌رێمێ یا به‌رهه‌ڤه‌ ئاسانكارییا بۆ كه‌رتێ تایبه‌ت و وه‌به‌رهێنه‌ران بكه‌ت، ژبه‌ركو حكومه‌ت و كه‌رتێ تایبه‌ت  بۆ پێشڤه‌برنا ئابوورێ هه‌رێما كوردستانێ و ره‌خساندنا ده‌رفه‌تێن كارى بۆ گه‌نجان تمامكه‌رێن ئێكن، و پێدڤییه‌ پرۆژه‌یێن وه‌به‌رهێنانێ ل دووڤ پلان و پێدڤییێن خه‌لكێ ده‌ڤه‌رێ بن.

زێده‌تر سه‌رۆكێ حكومه‌تێ ئاشكراكر، ل دووماهییا كۆمبوونێ ئاماده‌بوویان پێزانینێن خوه‌ بۆ كار ئاسانى و هه‌ماهه‌نگییا حكومه‌تا هه‌رێما كوردستانێ ده‌ربرى و چه‌ندین پێشنیاز و راسپارده‌ بۆ پێشڤه‌برنا پرۆسه‌یا وه‌به‌رهێنان و پێشخستنا ژێرخانه‌یا ئابوورى یا هه‌رێما كوردستانێ پێشكێشكرن.