وه‌زاره‌تا چاندنێ دێ 15 هه‌تا 100 ملیۆن دیناران وه‌كو قه‌ر ده‌ته‌ وه‌لاتییان

وه‌زاره‌تا چاندنێ ئاشكراكر، دێ 15 هه‌تا 100 ملیۆن دیناران وه‌كو قه‌ر و ل دووڤ چه‌ند مه‌رجان ب وه‌لاتییان ده‌ت.

وه‌زاره‌تا چاندن و ژێده‌رێن ئاڤێ ل هه‌رێما كوردستانێ چه‌ند رێكار دگشتاندنه‌كێدا بۆ فه‌رمانگه‌هێن وه‌زاره‌تێ به‌لاڤكرن، پشتى یاداشته‌كا لێكتێگه‌هشتنێ دگه‌ل بانكا ( ئه‌لقرتاس ئیسلامى ) ب مه‌ره‌ما دابینكرنا قه‌رێن بانكى و پشته‌ڤانیكرنا پرۆژه‌یێن جۆتیار و ده‌رچوویێن چاندن و ڤیتێرنه‌رى ئیمزاكرى.

ل دوور مه‌رج و رێكارێن وه‌رگرتنا قه‌ران ئاماژه‌ ب ئه‌ڤان خالان هاته‌ دان:

1 – وه‌رگرتنا مامه‌له‌یێن جۆتیار و ده‌رچووێن چاندن و ڤیتێرنه‌رى دێ بۆ وان كه‌سان بیت، ئه‌وێن دخوازن مفاى ژ ئه‌ڤان قه‌ران وه‌ربگرن و پرۆژه‌یێن بچووك و ناڤنجى بدانن و پرۆژه‌یێن خوه‌ بۆ رێڤه‌به‌رییا كاروبارێن قانوونى ل دیوانا وه‌زاره‌تێ فرێبكه‌ن.

2 –  پشته‌ڤانییا رێڤه‌به‌رییێن گشتى یێن وه‌زاره‌تا چاندنێ دگه‌ل هه‌موو به‌راییێن تایبه‌ت یێن پرۆژه‌ى هه‌ڤپێچ ببیت، داكو بۆ بانكا ناڤبرى بهێنه‌ هه‌لسه‌نگاندن و په‌سه‌ندكرن و ئاراسته‌كرن.

3 – خۆدانێ پرۆژه‌ی دێ پێدڤى ب ( كه‌فیل )ى بۆ بانكا ناڤبرى بیت و پێدڤییه‌ ئه‌و كه‌فیله‌ فه‌رمانبه‌رێ حكومه‌تێ بیت.

4 –  كوژمێ قه‌رى دێ ژ ( 15.000.000 هه‌تا 100.000.222 ملیۆن دیناران بیت  ) و دێ ل دووڤ ئاستێ پرۆه‌ژی هێته‌ دان، و قه‌ر دێ دماوێ ئێك هه‌تا پێنج سالاندا هێته‌ دان.

5 – كارێ وه‌زاره‌تێ ب تنێ هه‌لسه‌نگاندن و په‌سه‌ندكرن و پشته‌ڤانی و چاڤدێرییا پرۆژه‌یانه‌ ژلایێ هونه‌رى و پێشخستن و دابینكرنا ده‌رفه‌تێن كارى بۆ جۆتیار و ده‌رچوویێن چاندن و ڤیتێرنه‌رى.

6 –  هه‌موو رێكار وه‌كو ( قانوونى، دارایى و كارگێرى ) دێ ل بانكێ دگه‌ل خودانێ پرۆژه‌ی هێنه‌ ئێكلاكرن.