سه‌رۆكاتییا په‌رله‌مانێ كوردستانێ لدۆر هێرشا مووشه‌كى و درۆن و تۆپبارانێن ئیرانێ بۆ سه‌ر بنگه‌هـ و باره‌گا و جهێن مه‌دده‌نى ل كوردستانێ، د روونشتنا ئه‌ڤرۆ یا رۆژا پێنجشه‌مبى یا ژماره 6 یا وه‌رزێ پاییزا سالا چارێ ژ خۆلا پێنجێ یا په‌رله‌مانى د ڕاگه‌هاندنه‌كێدا هێرشا پاسدارێن ئیرانێ شه‌رمزاركر، پرس و سه‌ره‌خۆشیێن خوه ئاراسته‌یى بنه‌مالێن شه‌هیدان كر و هیڤیا چاره‌سه‌ریێ بۆ برینداران خوازت.
د ڕاگه‌هاندنه‌كا سه‌رۆكایه‌تییا په‌رله‌مانێ كوردستانێدا هاتییه، دوهى 28-09-2022 سوپایێ پاسداران د هێرشه‌كێدا چه‌ند ده‌ڤه‌رێن پارێزگه‌ها هه‌ولێر و سلێمانیێ بۆردومانكر، هه‌روه‌سا به‌رى چه‌ند رۆژان هێرش لسه‌ر ناوچا سیده‌كان و ده‌ڤه‌را برادۆست كرییه، د ئه‌نجامێ ئه‌ڤان هێرشێن نه ڕه‌وا و بۆردومانێن بێ پاسه‌وان یێن سوپایێن پاسداران هژماره‌كا وه‌لاتییان شه‌هید و برینداربوون.
سه‌رۆكایه‌تییا په‌رله‌مانێ كوردستانێ دیاركر، د ئه‌ڤێ هێرشێدا چه‌ندین ده‌ڤه‌رێن سڤیل و قوتابخانه و مال كرینه ئارمانج، ب ناڤێ په‌رله‌مانێ كوردستانێ ب تۆندى ئه‌ڤێ هێرشێ شه‌رمزاردكه‌ین و نابیت په‌نایێ بۆ تۆندوتیژیێ و مووشه‌ك و هێڕشێن سه‌ربازى و بۆردومانان ببه‌ن.
د ڕاگه‌هاندنا سه‌رۆكایه‌تییا په‌رله‌مانێ كوردستانێدا هاتییه، پەرلەمانێ كوردستانێ یا رژده لسه‌ر هه‌لویستێ خوه كو داخوازا په‌یوه‌ندیێن دۆستانه دكه‌ت لسه‌ر بنه‌مایێ رێز و بەرژەوەندیێن هاڤبەش و سەروەری و بنەمایێن جیران، چارەسەریا سەربازی و هێرش و مووشەكباران، ئاریشه‌یان چاره‌سه‌رناكه‌ن به‌لكو ئالۆزتر دبیت.
