ئه‌ڤرۆ چارشه‌مبى 12ى چریا ئێكێ یا سالا 2022ێ جڤاتا وه‌زیرێن هه‌رێما كوردستانێ ب سه‌رپه‌رشتییا مه‌سرور بارزانى سه‌رۆكێ جڤاتێ و جێگرێ ئه‌وى كۆمبوو.
دبرگه‌یا ئێكێ یا كۆمبوونێدا، ره‌شنڤیسێ پرۆژه قانوونا ( وه‌به‌رهێنانا كانزایان ل هه‌رێما كوردستانێ ) بۆ گوتوبێژكرن و را گهورینان هاته خواندن.
ل ده‌ستپێكێ سه‌رۆك و جێگرێن جڤاتا وه‌زیران دووپاتكرن پرۆژه قانوونا وه‌به‌رهێنانا كانزایان ل هه‌رێما كوردستانێ یا گرنگه و بهایێن خوه هه‌نه، و دیاركرن ئه‌ڤه پێنگاڤه‌كا گرنگه بۆ هه‌مه‌جۆركرنا ژێده‌رێن ئابوورى یێن هه‌رێمێ و رێكخستنا بوارێ وه‌به‌رهێنانێ ل سامانێن كانزایێن هه‌رێمێ ب ستراتیجییه‌كا نوو كو باشترین ئه‌زمون و پیڤه‌ر و رێكارێن كار پێكرى یێن نێڤده‌وله‌تى ب خۆڤه‌بگریت، ژبه‌ركو هه‌تا نوكه قانوونه‌كا كه‌ڤن یا عیراقێ یا سالا 1988ێ بكاردئێت و ئاسته‌نگێن مه‌زن تێدانه و دگه‌ل گهورینێن نوكه ناگونجیت.
دهێته چاڤه‌رێكرن ئه‌ڤ پرۆژه قانوونه ببیته ئه‌گه‌رێ هاندانا وه‌به‌رهێنه‌رێن بیانى سامانێن خوه دئه‌ڤى بیاڤیدا ل هه‌رێما كوردستانێ بكاربینن، پشتى دانوستاندن و را گهورینه‌كا به‌رفره‌هـ، جڤاتا وه‌زیران ژ چارچووڤێ گرنگیدانا ئه‌ڤێ قانوونێ بۆ گه‌شه‌كرنا ئابوورێ هه‌رێمێ و هه‌مه‌جۆركرنا ژێده‌رێن داهاتى، بریاردا لژنه‌یه‌كا تایبه‌تمه‌ند ژ وه‌زاره‌تێن ( سامانێن سرۆشتى، پلاندانان، بازرگانى و پیشه‌سازى ) و وه‌زیرێ هه‌رێمێ بۆ كاروبارێن په‌رله‌مانى و سه‌رۆكێ دیوان و سكرتێرێ جڤاتا وه‌زیران ) بۆ دوڤچوونا ئه‌وان تێبییێن ل سه‌ر ره‌شنڤیسێ هاتینه‌كرن، بهێته پێكئینان.
برگه‌یا دووێ یا كۆمبوونێ یا گرێدایبوو، ب دوڤچوونا بجهئینانا بریارا به‌رێ یا جڤاتا وه‌زیران سه‌باره‌ت به‌لاڤكرنا گازا سپى كو ژلایێ كه‌مال محه‌مه‌د سالح وه‌زیرێ سامانێن سرۆشتى ب وه‌كاله‌ت هاته خواندن، تێدا ئاماژه ب ئه‌وێ چه‌ندێ هاته كرن، سه‌رۆك وه‌زیرێن فیدرال ل سه‌ر داخوازا سه‌رۆك وه‌زیرێن هه‌رێما كوردستانێ ره‌زامه‌ندى ل سه‌ر هنارتنا 50 ملیۆن لیترێن گازا سپى ل ئه‌ڤێ هه‌یڤێ دایه، ئاماژه ب هندێ ژى هاته دان، وه‌زاره‌تا سامانێن سرۆشتى به‌رهه‌ڤی كرینه ل 20ى ئه‌ڤێ هه‌یڤێ ل ده‌ستپێكێ گازا سپى ل ده‌ڤه‌رێن چیایى و سار یێن هه‌رێمێ ب سه‌ر وه‌لاتییان دا به‌لاڤ بكه‌ت.
برگه‌یا سێیێ یا گرێدایبوو ب خواندنا پێشنیازا وه‌زاره‌تا كاروبارێن شه‌هید و ئه‌نفالكریان سه‌باره‌ت لێخوشبوون ل كه‌سوكارێن شه‌هید و ئه‌نفالكرى و به‌ركه‌ڤتییێن چه‌كێ كیمیایى بۆ ڤه‌گه‌راندنا ئه‌وێ به‌خشینه ( منحه ) یێن ژێ هاتینه وه‌رگرتن.
جڤاتا وه‌زیران دووپاتى ل ئه‌ركێ حكومه‌تێ بۆ خزمه‌تكرنا كه‌سوكارێن سه‌ربلندێن شه‌هید و ئه‌نفالكرى و به‌ركه‌ڤتییێن چه‌كێ كیمیایى كر، و دیاركر ئه‌و ژ هه‌ژى خزمه‌تكرنێ نه و دڤێت ره‌وشا ئه‌وان یا تایبه‌ت به‌رچاڤ بهێته وه‌رگرتن، كو ب سه‌رجه‌مێ ده‌نگان پێشنیازا وه‌زاره‌تا كاره‌بارێن شه‌هید و ئه‌نفالكرییان هاته په‌سه‌ندكرن
