نڤیسین: وەیسی عەبدولعەزیز وەیسی
18/10/2022
ئەڤرۆ 18/10/2022 (٤٤) سال لسەر شەهیدبوونا فەرماندە وەیسی بانی دەرباز دبن
شەهید وەیسی بانی سەمبۆلا خەبات و بەرخودانێ بوو، هەڤالێ چاکییێ و دەستپاکییێ بوو، ئەو قەهرەمانێ چیایێن کوردستانێ بوو.
هەر ژدەستپێكا ڤەگەرا بارزانیێ نەمر ژئێكەتیا سۆڤیێتا بەرێ بۆ عیراقێ وەیسی بانی تەڤی چەندین كەساتیێن عەشیرەتا مزیریا قەستا بەغدادێ كرن و چونە پێشوازیا بارزانیێ نەمر ولوێرێ سۆزا خەبات وتێكۆشینەكا بەردەوام هەتا داوی دلۆپا خینێ دا بارزانیێ نەمر وگەهشتە رێزێن پارتی دیموكراتی كوردستان و شۆرەشێ.
شەهید وەیسی دزانی هەلکرنا چریسکا شۆڕەشێ بو کوردینيێ و ڤێ ئاخا پیڕۆز نە کارەکێ هندە ئاسانە لێ باوەریەكا پۆلایین بڤێ ڕێبازا پیرۆز یا بارزانيیێ نەمر هەبوو.
شەهید وەیسی نەبتنێ وەك پێشمەرگەك و فەرماندەك مەیدانی لناڤا گۆرەپانێن شەر دا ئەركێ خۆ ددیت، بەلكو پێگەهەکێ بهێز بوو لـ قادێن دی یێن خەباتێ، هەر ژ دەستپێکا دەرکەفتنا وی بۆ ناڤ شوڕەشێ، ئەوی برەوشت وهشمەندی وهەلسوكەفتێن خۆ كارتێكرن لپرانیا خەلكێ گوندێن دەوروبەر کر و بۆ ئەگەرێ گەهشتنا چەندین گەنجێن دی بۆ ناڤا رێزێن پێشمەرگەی. دیسان ئەو پالپشتەکێ بهێز بوو ژبۆ گرنگیپێدان بڤێ خەباتا پیرۆز، لەورا ژی بابێ من كو تەمەنێ وی بتنێ ۱۲ سالبوون دەما باپیرێ من شەهید بووی هەرتم دەما بیرا شەهید وەیسی دكەت و مێرخاسیا وی لبیر دئینیت دبێژیت:”کەسەکێ بانی بیت (ژگۆندێ بانیێ بیت) یان ژی د گوندێ بانیێدا نان و ئاڤێت ڤی گوندی خوار و ڤەخواربیت یان ژی هەوایێ گوندی هەلکێشابیت، دێ هەر بەردەوامبیت لسەر ڤێ رێبازێ و قەت خیانەتێ و بندەستییێ قەبوول ناکەت”.
شەهيدێ جوانەمەرگ سەرکردەکێ چاڤنەترس و چاڤتێر و دووربین بوو، هەر لسەر ڤێ گوتنێ دەما کو پیلانگێڕییا ل دژی ملەتێ کورد ل (٦/٣/١٩٧٥)ێ شەهید وەیسی نەپەژڕاند خۆ ڕادەستی ڕژێما فاشیست بکەت، بۆیە ژی كۆچ دكەتە وەلاتێ ئیرانێ.
ل ئیرانێ شەهید وەیسی قەت ئارام نەبوو و لبچیكترین دەلیڤە دگەریا ژبۆ دۆبارە هەلكرنا ئاگرێ شۆرش و بەرخۆدانێ. لەورا ژی دەما چاڤ ب شەهیدێ جوانەمەرگ (شەهید ئدریس بارزانی) دکەڤیت، دبینن كا چەند یێ ڕشدە لسەر ڤەگەڕیانا بۆ ئاخا کوردستانێ و بەردەوامیدان ب خەباتێ، لوێرە شەهیدێ هەردەم ساخ ئدریس بارزانی زۆر ب مجداهیڤە داخواز ژێ کر کۆ چ پێدڤیە بۆ بکەن؛ لێ شەهید وەیسی هۆسا بەرسڤ دا: “ئاماژە كرە پێلاڤا خۆ یا میكاب و گۆت ئەڤە تێرا من سێ سالان دکەت و ئەڤ دەستێ خاكێن لبەر من تێرا من دو سالان دکەت”.
بشانازیڤە کۆ ئەڤرۆ دبێژم شەهید وەیسی ئێکەم کەس بوو پێ خۆ دانایە سەر ئاخا کوردستانێ و ئێکەم مەفرەزە بوون ژبۆ بەردەوامیدان بڤێ خەباتێ.
دیسان هەردەم بابێ من دبێژیت خۆ سەرفراز و شاناز دبینم كۆرێ شەهیدەكێ فەرماندە بم كو بابێ من بدرێژاهیا ئەوان هەمی سالان دا یێن خەبات و تێكۆشان تێدا كری بتایبەت ۱٤ سالێن شۆرشا ئەیلۆلێ و سەردەمێ (قیادا مؤقت) یێ شۆرشا گۆلانێ وهەتا رۆژا شەهید بووی، كەسەك هەتا نوكە نەهات بێژیت بابێ تە ئەڤ زۆرداریە لمن كریە، هەر چ كەسێ هاتی یێ گۆتی بابێ تە ئەڤ قەنجی یان ئەڤ هاریكاری و منەتە یا لمن كری، یان ژی پەسنا چاك و جامێری و مەردینی ودلسۆزیا وی یا كری، ئانكو بتەنێ ساخلەتێن باشیێ لسەر ڤەگێراینە وجارەكێ ژی تشتەك خراب لسەر نە گۆتینە. ئەڤە ژی تشتەك ئاسان نینە و كێم كەس هەنە كو دناڤا گەرمەگەرما شۆرشێ دا دسەركەفتن وشكەستنان دا و دناڤا كاودانێن دژوار وسەخت دا و لدەمێن برس و كێم پشتەڤانیێ دا و دیسان لساتە وەختێن شەهیدبوونا هەڤال و خزمان دا كو بشێن خۆ راگرن و لسەر هشێن خۆ بن و ئارامیا خۆ ژدەست نەدەن و ورەیا خۆ هەر بەرز وبلند بهێلن. بەلێ وەیسی ئەڤ مرۆڤێ خۆدان ئەڤی رەوشتێ هندە مازن و چاك بوو، رۆژەكێ ژی مالێ كەسەكی نە بریە یان خاریە یان هەتا تشتەكێ بچیك بخۆ وەك كەس ژسەركرداتیا شۆرشێ داخاز نەكریە، ئەو بۆ ڤێ خالێ لگۆپیتكا خۆنەویستیێ بوو، و مرۆڤەك بوو تا بێژی یێ چاڤتێر و رازی بوو.
د شەڤا تاری و دڵ تەنگدا کۆ شەڤا ١٨ ل سەر ١٩ێ یا مەها ١٠ سالا(١٩٧٨) ل گوندێ نسرا شەهيدبوون پەژڕاند سۆزا خۆ یا كو دئێكەم دیدار دا دایە بارزانیێ نەمر برە سەر وناڤێ خۆ بۆ هەتا هەتایێ ددیرۆكا بەرخۆدانا وخەباتا مللەتێ كورد دا نەخشاند و وەك هۆزانڤانێ هێژا موئەیەد تەیب دهۆزانەكا خۆ دا لسەر شەهید وەیسی دبێژیت:
بەلێ بەلێ وەیسیەك چۆ
بەلێ رێ بۆ هزار وەیسی یێت دی
ژنیكا ڤەبوو
بژیت کورد و کوردستان نەمری بو شەهیدان هەر بەرز و بڵندبیت ئالایێ کوردان.
