جێگرێ پارێزگارێ دهۆكێ بۆ ئاژانسا خانی راگەهاند، ژ 24 هەتا 30ی ڤێ هەیڤێ هەوەكا دەستبەسەرداگرتنا چەكێ بێ مۆلەت ل باژێرێ دهۆكێ دێ دەستپێكەت.
ماجد سەید سالح، جێگرێ پارێزگارێ دهۆكێ بۆ ئاژانسا خانی گۆت: هەر ژ 24 هەتا 30ی هەیڤا چریا ئێكێ، حەفتییا نەهێلانا چەكێ بێ مۆلەتە كو ژلایێ نەتەوێن ئێكگرتی ڤە هاتییە دیاركرن، حكومەتا هەرێما كوردستانێ ژی وەك پێگریكرن ب ڤێ حەفتییێ دێ هەوەكا دەستبسەرداگرتنا چەكی دەستپێكەت.
دیار ژی كر، ل دویڤ بریارا جڤاتا وەزیران و وەزیرێ ناڤخۆ و پارێزگارێ دهۆكێ، دوو رۆژێن بووری ل دیوانا پارێزگەهێ كۆمبوونەك لگەل لایەنێن ئەمنی هاتییەكرن بۆ خوە بەرهەڤكرنێ و پێرابوونێن پێدڤی ژی هاتینەكرن و لایەنێن ئەمنی یێن پەیوەندیدار هاتینە راسپاردن بۆ دەستپێكرنا وێ.
