ئهڤرۆ ئێكشهمبی 30/10/2022 ێ، مهسرور بارزانى، سەرۆکێ حکومەتا هەرێما کوردستانێ، پێشوازی ل گریگۆری گالیگان، بالیۆزێ کەنەدا ل عێراقێ کر، د دیدارەکێ دا بیروڕا دەربارەیی رهوشا گشتی یا عێراقێ پشتی پێکئینانا حکومەتا نوو و پێشخستنا پەیوەندییێن هەرێما کوردستانێ و کەنەدا هاتنه بهحس كرن.
سەرۆکێ حکومەتێ ئاماژە ب هندێ دا، كو پشتی پێکئینانا حکومەتا نوو یا عێراقێ، دەلیڤهك پهیدا بوویه بۆ هندێ حکومەت ب هاریکارییا هەموو لایەنان، خزمەتا گشت پێکهاتان بکهت بێی جۆداهی، هەروەسا کێشێن دناڤبهرا هەرێما کوردستانێ و حکومەتا فیدرالی، ب شێوێ بنەڕەتی و ل سەر بنەمایێ دەستووری و پابەندبوون ب پرنسیپێن ههڤپشكییا ڕاستەقینە و ههڤسەنگی و سازانێ، چارەسەر بکهت.
بالیۆزێ کەنەدا، ستاییشا چاکسازییێن کابینا نههێ یا حکومەتا هەرێما کوردستانێ کر، ب تایبەتی د بیاڤێ ب دیجیتەلکرنا خزمەتگوزارییێن گشتی و هاڤێتنا گاڤان بەرەف حوکومڕانییا ئەلیکترۆنی، ئامادەییا وهلاتێ خوه دەربڕی بۆ پێشکێشکرنا هەر هاریکارییەکا پێدڤی د وی بیاڤی دا.
گرنگییا پاراستنا ئاسایشێ و سەقامگیرییا هەرێما کوردستانێ و عێراقێ و ڤێ دهڤهرێ ب گشتی و بنبڕکرنا ھەموو کارێن تیرۆریستی، ھەروەسا کاریگەرییێن نەرێنی یێن گوهۆرینێن سهقایی ل سەر ژیانا خەڵکی، پشكهكا دی یا وێ دیدارێ بوو.
