نێچيرڤان بارزانى، سهرۆكێ ههرێما كوردستانێ ئهڤرۆ پێشوازى ل ئێلێنا رۆمانۆوسكى، بالیۆزا ئهمریكا ل عیراق و شاندهكێ ديپلۆماسى و لهشكهرییێ هاریكار كر.
سهرۆكێ ههرێما كوردستانێ و بالیۆزا ئهمریكا، د كۆمبوونێدا دوماهیك پێشهاتێن سياسييێن عیراق، پێكئینانا حكومهتا نوى یا عیراقێ و پهیوهندیێن هاڤسهنگ یێن عیراق دگهل وهلاتێن جیران و دهڤهرێ گۆتۆبێژكرن و دووپات ل گرنگیا دهستنيشانكرنا كارێن دهسپێكى یێن حكومهتا عیراق بۆ چارهسهركرنا ئاریشهیان كر.
نێچيرڤان بارزانى و ئێلێنا رۆمانۆوسكى د ههڤڕابوون كو پێكئینانا حكومهتا نوى یا عیراقێ دهرفهتهكه بۆ چارهسهركرنا ئاریشهیان و دشێن كار بۆ ئارامى و سهقامگیریا وهلاتى بكهن كو كارڤهدان لسهر سهقامگیریا ههمى دهڤهرێدا ههیه و ههروهسا دهرفهتهك ههیه بۆ خۆشكرنا رێكێ ههروهسا بۆ پێشئێخستنا وهبهرهێنانێ و داهاتێ وهلاتى.
پهیوهندیێن ئهمریكا دگهل عیراق و ههرێما كوردستانێ تهوهرهكێ دى یێ كۆمبوونێ بوون و تێدا دووپات ل خواستنا ئهمریكا بۆ پێشڤهبرن ب هاریكارى و پهیوهندیێن دگهل عیراق و ههرێما كوردستانێ كر، بالیۆزا ئهمریكا پرۆسا چاكسازیێ و ئێكخستنا پێشمهرگهى و پشتهڤانى و هاریكارییا وهلاتێ خوه بۆ سهرئێخستنا پرۆسهیێ نیشاندا.
نێچيرڤان بارزانى و بالیۆزا ئهمریكا، ئاریشهیێن ههولێر ـ بهغدا، بزاڤێن چارهسهركرنێ، گرنگییا چارهسهركرنا ئاریشهیێن پهترۆل و غاز دگهل بهغدا، رهوشا ناڤخۆیا ههرێما كوردستانێ و گرنگيیا كێمكرنا ئالۆزییان، گوهورینێن كهشوههواى، چاكسازيیا ئابوورى، رهوشا دهڤهرێ ب گشتى و چهند پرسێن دى یێن گرنگ یێن هاڤبهش گۆتۆبێژكرن.
