پشتی 12 سالان ژ ئەنجام نەدانا كۆنگرێ حزبێ، ئەڤرۆ رۆژا پێنجشەمبی 3ی چریا دووێ، پارتی دیمۆكراتی كوردستان دێ كۆنگرێ خوە یێ چاردێ ل باژێرێ دهۆكێ ئەنجامدەت.
د كۆنگرێ 14ێ یێ پارتی دا زێدەتری 1000 نوینەران دێ ئامادە بن و بۆ دەمێ سێ رۆژان دێ یێ بەردەوام بیت.
زانیاری ل دۆر هەر 13 كۆنگرەیێن پێشتر یێن پارتی:
كۆنگرێ ئێكێ:
ل 16ی ئابا سالا 1946ێ ب رەنگەكێ نهێنی ل مالا سەعید فەهیم ل باژێرێ بەغدا و ب ئامادەبوونا 70 ئەندامان هاتە ئەنجامدان. ژبەر مژویلبوونا وی ب داكۆكی كرنێ ژ كۆمارا كوردستان، مستەفا بارزانی ئامادەنەبوو. د وی كۆنگرەی دا پەیرەو و پرۆگرامێ پارتی هاتە پەسەندكرن و ناڤێ حزبێ ژی بۆ ( پارتی دیمۆكراتی كورد ).
كۆنگرێ دووێ:
ل ئادارا سالا 1951ێ ل مالا عەلی حەمەد ل باژێرێ بەغدا و ب ئامادەبوونا 30 ئەندامان هاتە ئەنجامدان و تێدا سەركردایەتییەكا دەمكی بۆ پارتێ هاتە دانان.
كۆنگرێ سێیێ:
ل 26ی كانوونا دووێ یا سالا 1953ێ ل باژێرێ كەركووكێ هاتە ئەنجامدان و تێدا نێزیكی 40 نوینەران د پشكداربوون. ناڤێ حزبێ هاتە گۆهورین بۆ ( پارتی دیمۆكراتی كوردستان )و رێكخراوێن قۆتابییان، ژنان و لاوان هاتنە دامەزراندن.
كۆنگرێ چارێ:
ل 4 هەتا 7ی چریا ئێكێ یا سالا 1959ێ ل مالا كاك زیاد ل باژێرێ بەغدا هاتە ئەنجامدان و نێزیكی 130 ئەندامان تێدا ئامادەبوون. ئێكەم كۆنگرە بوو مستەفا بارزانی تێدا پشكداربیت.
كۆنگرێ پێنجێ:
ل ئەیارا سالا 1960ێ ل بارەگایێ پارتی ل بەغدا و ب ئامادەبوونا 148 ئەندامان هاتە ئەنجامدان.
كۆنگرێ شەشێ:
ل دەستپێكا هەیڤا تەمموزا سالا 1964ێ ل قەلادزێ هاتە ئەنجامدان. د وی كۆنگرەی دا ئەندامێن كۆمیتەیا ناڤەندی هاتنە هەلبژارتن.
كۆنگرێ حەفتێ:
ل 15ی چریا دووێ یا سالا 1966ێ ب ئامادەبوونا 370 ئەندامان ل گەلالە هاتە ئەنجامدان. د كۆنگرێ حەفتێ دا هندەك دەستكاری د پەیرەو و پرۆگرامێ حزبێ دا هاتنەكرن، ژوان ژی ئەندامێن مەكتەبا سیاسی ژ پێنج كەسان بوونە حەفت كەس.
كۆنگرێ هەشتێ:
ل 1ی تەمموزا سالا 1970ێ ب ئامادەبوونا 488 ئەندامان ل ناوپردان هاتە ئەنجامدان. ئەو كۆنگرە مەزنترین كۆنگرێ پارتی بوو پشتی ئیمزاكرنا رێككەفتناما 11ی ئادارێ. هەروەسا بۆ جارا ئێكێ هەژمارەكا مەزن یا ژنان پشكداری كر و هنارتییێن چەندین حزبان ژی پشكداربوون.
كۆنگرێ نەهێ:
ل 4ی چریا ئێكێ یا سالا 1979ێ ل دەڤەرا مەرگەوەر ل رۆژهەلاتێ كوردستانێ هاتە ئەنجامدان. ئێكەم كۆنگرە بوو پشتی شكەستنا سالا 1975ێ، و تێدا پشتی وەغەركرنا مستەفا بارزانی و ب زۆرینەیا دەنگان سەرۆك مەسعود بارزانی ب سەرۆكێ پارتی هاتە هەلبژارتن.
كۆنگرێ دەهێ:
ل 2ی كانوونا ئێكێ یا سالا 1989ێ ل دەڤەرا مەگەوەر و ب ئامادەبوونا 332 ئەندامان هاتە ئەنجامدان. ئەو كۆنگرە پشتی وەغەركرنا ئدریس بارزانی، هەوا ئەنفالان و كیمیا بارانكرنا حەلەبجە بوو و تێدا بەحس ل خوە ئامادەكرنێ بۆ قۆناغا نوی یا خەباتێ هاتەكرن.
كۆنگرێ یازدێ:
ل سالا 1993ێ ب پشكدارییا 2 هزار و 167 ئەندامان ل باژێرێ هەولێرێ هاتە ئەنجامدان. ئێكەم كۆنگرە بوو پشتی رزگاربوونا هەرێما كوردستانێ و دامەزراندنا پەرلەمانی و حكومەتا هەرێما كوردستانێ. د وی كۆنگرەی دا پارتی و ئێكگرتنێ ئێكگرت، ب ڤی رەنگی پشكەكا سەركردایەتییا پێشتر یا حزبا سۆسیالست، پارتا گەل و پاسۆك، كو حزبەكا نوی ب ناڤێ ئێكگرتن دامەزراندبوو چوونە ناڤا رێزێن پارتی. كۆنگرێ یازدێ زورترین ئەندامان تێدا پشكداری كر د مێژوویا پارتی دا.
كۆنگرێ دوازدێ:
ل 10 هەتا 14ی حوزەیرانا سالا 1999ێ ب ئامادەبوونا هزار و 473 ئەندامان ل هەولێرێ هاتە ئەنجامدان. ئەو كۆنگرە پشتی شەرێ خوەكۆژییێ بوو و تێدا گۆرانكارییێن نوی د پەیرەو و پرۆگرامێ حزبێ دا هاتنەكرن.
