<h2 style="text-align: justify;"><span style="font-size: 18pt;"><strong>پەرلەمانێ کوردستانێ:"ب تووندی ئیدانەیا دوماهی هێرشا ئیرانێ بۆ سەر چەند دەڤەرێن هەرێما کوردستانێ دکەت."</strong></span></h2> <h2 style="text-align: justify;"><span style="font-size: 18pt;"><strong> </strong>رۆژا دووشەمبی 21-11-2022، پەرلەمانێ کوردستانێ د ڕاگەهاندنەکێ دا باس ل هێرشا ئیرانێ بۆ سەر هەرێما کوردستانێ کر و گوت،"ب دلگرانیەکا مەزنڤە بەڕ خۆ ددەینە دوماهی هێرشا مووشەکی و درۆنی یا هێزێن کۆمارا ئیسلامی یا ئیرانێ ل شەڤا 20 لسەر 21ی 11 بۆ سەر چەند دەڤەرێن پارێزگەهێن هەولێر و سلێمانییێ و ب تووندی ئەڤان هێرشێن بێ ئەگەر ئیدانە دکەین."</span></h2> <h2 style="text-align: justify;"><span style="font-size: 18pt;">پەرلەمانێ کوردستانێ دوپاتی ل پێدڤییا بەرەڤ پێشڤەبرنا پەیوەندییان دگەل گشت وەلاتێن جیران لسەر بنەمایێ ڕێزگرتنا هەڤپشک و بەرژەوەندییێن هەڤپشک و دەستوەرنەدان د کاروبارێن نافخۆ یێن ئێکو دوو و پێگیربوونا تمام ب یاسا و ڕێسایێن نیڤدەولەتی دکەت.</span></h2> <h2 style="text-align: justify;"><span style="font-size: 18pt;">د ڕاگەهاندنێ دا هاتییە،"ھێرش و پەلامارێن لەشکەری ژ هەر لایەکی بیت ئیدانە دکەین و ئەم هزر دکەین چارەسەری و میکانزما لەشکەری نە کو چ ئاریشان چارەسەر ناکەت، بەلکو ڕێڕەوێ چارەسەری و ئاشتییا دەڤەرێ ژی دێ ئێخیتە د مەترسیا زێدەتر دا." </span></h2> <h2 style="text-align: justify;"><span style="font-size: 18pt;">پەرلەمانێ کوردستانێ داخواز ژ حکومەتا عیراقێ دکەت زێدەتر ب ئەرکێ دەستووری یێ خۆ رابیت بۆ پاراستنا سەروەرییا عیراقێ ب هەرێما کوردستانێ ژی ڤە و هەمی رێکێن دبلوماسی بۆ ڤێ ئارمانجێ بگریتە بەر.</span></h2> <h2 style="text-align: justify;"><span style="font-size: 18pt;">پەرلەمانێ کوردستانێ گوتیە ژی: پاراستنا ئاسایشا دەڤەرێ ئەرکێ جڤاتا ئاسایشا نیڤدەولەتی و جڤاکێ نیڤدەولەتیە بۆ ڕێگری کرن ل گەشەکرنا نە ئارامییێ،" ب ئەرکێ لسەر ملێن خۆ رابن".</span></h2>
