ره‌وان نهێلی
(ره‌نگه ئه‌و روودانا ل 17 مه‌ها 11 ل سلێمانیێ دروستبووی و 15 كه‌سێن بێگونه‌هـ بووینه قوربانی، ل دهۆكێ ژی ئه‌و روودان دروست ببن)
كۆمپانیه‌كا دهۆكێ، هوستایه‌كێ زیره‌ك یێ دانانا شوڤاژی ل ئیرانێ ئینابوو، پشتی هۆستای دو سێ مه‌هه‌كان كاركری و ئێك دو كرێكارێن كۆمپانیێ به‌رده‌ستێ هوستای شۆلكری، پاشان گوتنه هۆستایێ ئیرانی مه شۆل ب ته نه‌ما و وان كرێكارێن ئه‌زموونا دو سێ مه‌هی هه‌یی ده‌ست ب دانانا سیسته‌مێ شوڤاژا مالان كر.
ل كوردستانێ پرانیا كارێن مه د بێی سیسته‌من، د بێی خواندن و چاڤدێرینه و دبێی كۆالتی نه، ره‌نگه ئه‌و روودانا ل 17 مه‌ها 11 ل سلێمانیێ دروستبووی و 15 كه‌سێن بێگونه‌هـ بووینه قوربانی، ل دهۆكێ ژی ئه‌و روودان دروست ببن، كۆمپانیێن ڤی كاری دكه‌ن، پێدڤیه سالانه ده‌مێ زڤستان دهێت و غاز دهێته بكارئینان، كارمه‌ندێن كۆمپانیێ سه‌حكه‌نه هه‌می سیسته‌می بزانن غاز ل به‌ر چ جهه‌كێ دچیت داكو چ كاره‌سات لێ دروست نه‌بن، ب هزاره‌هان خه‌لكێ دهۆكێ تانكێن غازێ داناینه سه‌ر بانێن مالێن خوه و سالانه چ دویڤچوون بۆ ناهێته كرن، ئه‌ڤ سیسته‌مه ئه‌گه‌ر ب تانكێ غازێ ڤه بپه‌قیت وه‌كو مه ل سلێمانیێ دیتی دێ زیانێ گه‌هینه ده‌وروبه‌ران ژی، له‌وما گه‌له‌ك یا پێدڤیه لژنه‌یه‌ك ل پارێزگه‌هـ و قایمقامیا دهۆكێ بهێته پێكئینان و دووڤچوونا ڤی بابه‌تی بكه‌ن، بزانن ئه‌و كه‌سێن كارێ دانانا سیسته‌مێ غازێ دكه‌ن، چ ئه‌زموون هه‌نه؟ ل كیڤه فێر بووینه‌ر و چ باوه‌رنامه؟ نوكه ل دهۆكێ ل پرۆژێن ئاكنجیبوونێ ژی سیسته‌مێ غازێ دهێته دانان، دڤێت چاڤدێریا حوكمه‌تێ ل سه‌ر ڤان كۆمپانیان هه‌بیت، چونكو حوكمه‌ت به‌رپرسه ژ پاراستنا ژیانا خه‌لكی و ئێدی رێ نه‌هێته دان ب دانانا ڤی سیسته‌مێ غازێ ل مالان و ل پرۆژێن ئاكنجیبوونێ، ئه‌گه‌ر ئه‌و كۆمپانیا گه‌ره‌نییا 10 سالان نه‌كه‌ت ب تایبه‌ت یێن مالان دڤێت رێ پێ نه‌هێته دان، ژبه‌ر كو ئه‌گه‌ر ته پێ چێ ببیت پێنج هه‌تا ده‌هـ هزار دۆلاران ڤی سیسته‌می دانی و تانكی دانییه سه‌ر بانی، بزانه جیرانێ ته هه‌تا مرنێ دێ ب ترس ژیت، ترس ژ په‌قینا ڤی تانكێ غازێ.
تیبینی: ئەڤ گۆتارە بەری روودانا پەقینا دهۆکێ هاتییە نڤیسین
