فازل نەبی: سەرەدانا سەرۆکێ ھەرێمێ بۆ به‌غدا دێ کاریگەری ھەبن

ئاژانسا خانی ، تایبەت:

بریکارێ بەرێ یێ وەزارەتا داراییا عێراقێ ئاشکراکر: نێچیرڤان بارزانی ل عێراقێ کەسەکێ خۆشتڤییە و سەرەدانا وی بۆ بەغدا دێ کاریگەری ھەبن ل سەر پەیوەندیێن دناڤبەرا ھەرێما کوردستانێ و بەغدا دا.

فازل نەبی، زیده‌تر بۆ ئاژانسا خانی دیار کر” نێچیرڤان بارزانی کەسه‌كێ خۆشتڤییە ل جادا عێراقێ و سالێن بەرێ ژی دەمێ ئەز ل بەغدا بووم زۆر جاران دەمێ ئاریشەک پەیدا دبوو دناڤبەرا ھەرێم و بەغدا دەمێ ئەز ل گەل سەرۆک وەزیران د ئاخفتم ھەموو یان دگۆت” نێچیرڤان بارزانی برایێ مەیە و ئەوا دشیان دابیت دێ بۆ ھەرێما کوردستانێ ھێتە کرن، بەلێ مخابن ژبەر ھندەک ئەگەرێن سیاسی ھەتا نوکە شاندێن ھەرێما کوردستانێ نەچووینە بەغدا.

فازل نەبی گۆت ژی” سەرەدانا دوھی یا نێچیرڤان بارزانی بۆ بەغدا دێ کاریگەری یێن زۆر ھەبن ل سەر پەیوەندیێن دناڤبەرا ھەولێر و بەغدا، ب تایبەتی پاراستنا سەروەرییا ھەرێما کوردستانێ، چونکی ئەرکێ سەرۆکێ ھەرێما کوردستانێ پشکەکە ژ سەروەریا ئاخا عێراقێ، لەوما پێدڤی ھەبوو ئەو سەرەدانه‌ بھێتە ئەنجامدان، هه‌روه‌سا سەرۆکێ ھەرێما کوردستانێ زەمینەسازییەکا باش کرییە بۆ سەرەدانا شاندێ حوکمەتا ھەرێما کوردستانێ، چەندین پرسێن ھەلاویستی ھەنە دناڤبەرا ھەرێم و بەغدا پێدڤی ب چارەسەرکرنێ ھەنە.