د کۆمبوونا بهێت یا پەرلەمانێ کوردستانێدا دێ سیستەمێ غازێ ھێتە بەحسکرن

بریارە لیژنه‌یا سامانێن سرۆشتی راپۆرتەکێ ل دۆر ئاریشەیێن غازێ بەرھەڤ بکەت و جێگرا سەرۆکا لژنه‌یێ ژی ئاشکراکر، د کۆمبوونا بهێت یا پەرلەمانێ کوردستانێدا دێ بەحسێ غازێ ھێتەکرن.

گولیزار سندی، جێگرا سەرۆکێ لژنه‌یا سامانێن سرۆشتی بۆ ئاژانسا خانی دیارکر، دووھی لژنه‌یا سامانێن سرۆشتی ل دۆر ئاریشەیێن غازێ کۆمبوویە و تێدا ب ھویری بەحسێ ڤەدیتنا چارەسەرییەکێ بۆ ئەوان ئاریشەیێن نوکە د بکارئینانا غازێدا هه‌ین هاتییه‌ كرن، لژنه‌یێ نڤیسارەکا فەرمی ب مەرەما دوفچوونێ ئاراستەی وەزارەتا سامانێن سرۆشتی کرییە.

گولیزار سندی ئاماژەکر، بڕیارە د کۆمبوونا بهێت یا پەرلەمانێ کوردستانێدا مژارا غازێ ئێک ژ کارنامه‌یێن کۆمبوونا پەرلەمانی بیت، ھەروسا لژنە دێ راپۆرتەکێ ل دۆر ئاریشەیێن غازێ بەرھەڤ کەت و تێدا ھویرکاری دێ ھێنە بەرچاڤکرن، ژبه‌ركو ئەڤە چەندین روودان ب ئەگەرێ بکارئینانا غازێ هاتنه‌ تۆمارکرن و خەلک بوویه‌ قوربانی.