نێچیرڤان بارزانی، سەرۆکێ ھەرێما کوردستانێ، ئەڤرۆ ب هەلکەفتا ڕۆژا بەرهنگاربوون و نەھێلانا توندوتیژییێ ل دژی ژنان، پەیامەک بەلاڤکر، ئەڤە دەقێ وێیە:
ئەڤرۆ 25 ی نۆڤه‌مبه‌رێ، ل رۆژا جيهانییا به‌رهنگاربوونا توندوتيژییێ ل دژى ژنان، هه‌موو پشتگيرييه‌كێ بۆ خه‌بات و ئازادى و مافێن ژنێ و يه‌كسانییێ دوپات دکه‌ين، وه‌ك هەردەم دێ د بزاڤ و كار و خەباتێ دا به‌رده‌وام بين بۆ ب ده‌ستڤەئینانا زێدەتر و پاراستنا مافێن ژنێ و چێکرنا جڤاکەکێ كو ژن تێدا یا ئازاد و يه‌كسان بیت و ب چ بهانەکێ گەفێن توندوتيژییێ و كوشتنێ ل سه‌ر نه‌بن، هەتا ژن ئازاد نه‌بیت، جڤاکەکێ ئازاد و يه‌كسان و ئارام و مه‌ده‌نی یێ پێشكه‌فتی پەیدا نابیت.
د ڤێ هەلکەفتێدا دوپات دكه‌ين، كو ب هه‌موو رەنگان دێ بەرهنگاری هه‌موو جۆره توندوتيژییێ و ده‌ستدرێژییێ و پێشێلكارييه‌كێ به‌رامبه‌ری ماف و ئازاديیا ژنان بين و دێ د كاركرنێ دا به‌رده‌وام بين بۆ نه‌هێلانا بيرا توندڕه‌وییێ و پەیداکرنا زه‌مينه‌کێ باشتر یێ پشکدارى و هەڤپشک یێ ژنان د بیاڤێ سياسى و كارگێڕيیێ هه‌رێما كوردستانێ دا.
ل گه‌ل لايه‌نێن په‌يوه‌نديدار یێن ناڤخۆ و ل سه‌ر ئاستێ نێڤده‌ولەتی ژی دێ هاريكار و هه‌ماهه‌نگ بين بۆ هندێ ژن ژ هه‌موو ڕوويه‌كێ ڤە دناڤا خێزانێ و ل جهێ کاری و ل سەرجەم بیاڤێن گشتی دا بهێتە پاراستن و یا دوور بیت ژ توندوتیژییێ.
سلاڤ و پێزانین بۆ هەموو وان ژن و وان لايه‌ن و ڕێكخراوێن ڕۆژانە د خەباتێ دا بۆ ب دەستڤەئینانا ئازادی و ئاشتییێ و مافێن وان، سلاڤ بۆ گيانێ پاقژێ قوربانی یێن توندوتيژییێ ل دژى ژنان و هه‌موو وان خانمان دهنێرين یێن کو ژ پێناڤی ئازادى و يه‌كسانییێ و ئاشتيیێ دا خه‌بات كری، ل هه‌ر جهەکێ جيهانێ بن، ب ڕێز و شكۆڤه ب بیر دئینین.
