مه‌سرور بارزانى سه‌رپه‌رشتییا كۆمبوونه‌كا گرنگ كر

سه‌رۆكێ حكومه‌تا هه‌رێما كوردستانێ سه‌رپه‌رشتییا كۆمبوونا به‌رهه‌ڤییێن ده‌سبكاربوونا ده‌سته‌یا باوه‌ردانێ ب دامه‌زراوه‌ و پرۆگرامێن په‌روه‌رده‌ و خواندنا بلند ل هه‌رێما كورستانێ كر.

ئه‌ڤرۆ پێنجى كانوونا ئێكێ یا 2022ێ مه‌سرور بارزانى سه‌رۆكێ حكومه‌تا هه‌رێما كوردستانێ سه‌رپه‌رشتییا كۆمبوونا به‌رهه‌ڤییێن ده‌ستبكاربوونا ده‌سته‌یا باوه‌ردانێ ب دامه‌زراوه‌ و پرۆگرامێن په‌روه‌رده‌ و خواندنا بلند ل هه‌رێما كوردستانێ كر، كو قانوونا ژماره‌ شه‌ش یا سالا 2022ێ ل 4-8-2022ێ كه‌ڤتییه‌ دبوارێ بجهئینانێدا.

سه‌رۆكێ حكومه‌تێ دووپاتى ل گرنگییا هه‌بوونا ئه‌ڤێ ده‌سته‌یێ كر و ئاماژه‌ ب هندێ دا كو ئارمانجا سه‌ره‌كى ژ دامه‌زراندنا ئه‌ڤێ ده‌سته‌یێ ئه‌وه‌، كۆمه‌كا پیڤه‌ر و ستانداردێن كارپێكرى یێن نێڤده‌وله‌تى، بۆ خواندن و پرۆگرامێن په‌روه‌رده‌ و خواندنا بلند ل هه‌رێما كوردستانێ بهێته‌ دانان، و كار بۆ كێمكرنا جووداهییێن ئاست و كوالیتییا زانستی یێن ناڤه‌ندێن خواندن و زانكۆیێ، كه‌رتێ تایبه‌ت و گشتى بكه‌ت، بۆ پشتراستبوون ژ بلندكرنا ئاستێ په‌روه‌رده‌ و زانستێ دامه‌زراوه‌یێن په‌روه‌رده‌ و خواندنا بلند یا هه‌رێما كوردستانێ، سه‌ربارى دانانا پیڤه‌رێن گونجاى بۆ چه‌سپاندنا بنه‌مایێن باوه‌ردانێ ب رێكا رێكخستنا پرۆسه‌یا پێداچوون و چاڤدێریكرن و پشته‌ڤانیكرنا هه‌ردوو وه‌زاره‌تێن په‌روه‌رده‌ و خواندنا بلند و ڤه‌كۆلینێن زانستى بۆ پێشڤه‌برنا شیانێن مرۆڤى و بده‌ستڤه‌ئینانا باوه‌رنامه‌یا باوه‌ردانێ بۆ زانكۆ و قوتابخانه‌یان.

دكۆمبوونێدا، هه‌ر ئێك ژ وه‌زیرێن خواندنا بلند و ڤه‌كۆلینێن زانستى و په‌روه‌رده‌ و سكرتێرێ جڤاتا وه‌زیران، په‌یامێن خوه‌ بۆ میكانیزما بجهئینانا قانوونێ گه‌هاندن، هه‌روه‌سا شیانێن نوكه‌ یێن وه‌زاره‌ت و دامه‌زراوه‌یان و چه‌وانییا مفا وه‌رگرتن ژ ده‌رفه‌تێن پێشڤه‌برنا پرۆگرام و شیانان ب ئاراسته‌یێ بجهئینانا ئارمانجا قانوونێ دیاركرن.