ئه‌ڤرۆ چارشه‌مبى حه‌فتى كانوونا ئێكێ یا 2022ێ سه‌رۆكێ هه‌رێما كوردستانێ نێچیرڤان بارزانى پێشوازى ل توبیاس تۆنكێل به‌رپرسێ كه‌یسا رۆژهه‌لاتا ناڤه‌راست ل وه‌زاره‌تا ده‌رڤه یا ئه‌لمانیا و شاندێ دگه‌لدا كر، كو بالیۆزێ ئه‌لمانیا ل عیراقێ و كونسۆلێ وان یێ گشتى ل هه‌رێما كوردستانێ دگه‌لدا بوون.
دكۆمبوونا واندا په‌یوه‌ندییێن ئه‌لمانیا دگه‌ل عیراق و هه‌رێما كوردستانێ، ره‌وشا ده‌ڤه‌رێ ب گشتى، په‌یوه‌ندییێن هه‌ولێر و به‌غدا، په‌یوه‌ندییێن عیراق و هه‌رێما كوردستانێ دگه‌ل وه‌لاتێن جیران هاتنه گوتوبێژكرن.
سه‌رۆك نێچیرڤان بارزانى سوپاسییا هاریكارییێن سه‌ربازى و مرۆڤى یێن ئه‌لمانیا بۆ هه‌رێما كوردستانێ دشه‌رێ دژى تیرۆرێدا كر، و كورتییه‌ك ده‌رباره‌ى دووماهى سه‌ره‌دانا خوه بۆ به‌غدا و دیدار و كۆمبوونێن دگه‌ل به‌رپرسێن بلند یێن عیراقێ روونكر.
توبیاس تۆنكێل به‌حسا ئارمانج و به‌رنامه‌یێ سه‌ره‌دانا خوه بۆ هه‌رێما كوردستانێ و ده‌ڤه‌رێ كر، و حه‌زا وه‌لاتێ خوه بۆ به‌رده‌وامیدانا هاریكارى و پشته‌ڤانییێ بۆ عیراق و هه‌رێما كوردستانێ و چاره‌سه‌ركرنا ئاریشه‌یێن هه‌لاویستى یێن هه‌ولێر و به‌غدا نیشاندا.
ره‌وشا ئێمناهییا ده‌ڤه‌رێ ب گشتى، ره‌وشا ئاواره و په‌نابه‌ران و ره‌خساندنا زه‌مینه‌یه‌كێ ب مه‌ره‌ما ڤه‌گه‌راندنا وان بۆ جهێن وان و بجهئینانا رێككه‌ڤتنا شنگالێ، لایه‌كێ دى یێ دیدارێ بوو كو تێدا دووباتى ل به‌رده‌وامییا هاریكارییێن مرۆڤى یێن ئه‌لمانیا بۆ ئاواره و په‌نابه‌ران دووپاتكر.
