رێڤەبەرێ نەخۆشخانا دكتۆر جەمال ئەحمەد یا زارۆكان ل سلێمانیێ راگەهاند، ب ئەگەرێ بایكۆتا پەرستارێن پشكا چاڤدێرییا چر، ئەو پشك هاتییە داخستن و چەندین زارۆكان گیانێ خوە ژدەستدایە.
دكتۆر پشدەر عەبدولا، رێڤەبەرێ نەخۆشخانا دكتۆر جەمال ئەحمەد د پرێس كۆنفرانسەكی دا راگەهاند، نێزیكی هەیڤ و نیڤایە پشكا چاڤدێرییا چر ل نەخۆشخانا وان هاتییە داخستن ب ئەگەرێ مانگرتنا پەرستارێن وێ پشكێ كو 25 كارمەندن.
دیار ژی كر، ئەو پەرستارە ل دەمێ بەلاڤبوونا كۆرۆنایێ ب گرێبەست هاتبوونە دامەزراندن و پشتی كێمبوونا حالەتێن كۆرۆنایێ گرێبەستێن وان نەهاتنە نویكرن، ئەوان ژی مانگرتییە و دەوامێ ناكەن. داخستنا وێ پشكێ بارگرانییەكا مەزن ل سەر ملێن وەلاتییان درۆستكرییە و چەندین زارۆكان ژی گیانێ خوە ژدەستدایە.
رێڤەبەرێ نەخۆشخانێ داخواز ژ وەزارەتا ساخلەمییێ كر گرێبەستێن وان پەرستاران بۆ نوی بكەت یان بكەتە هەمیشەی، داكو ئەو پشكە نەهێتە راوەستاندن و وەك رێزگرتن ژی بۆ وێ ماندیبوونا وان ل دەمێ چارەسەركرنا توشبوویێن كۆرۆنایێ دیتی.
