داریان سەعید
میدیا ب هەمی ئالاڤێن خۆ ڤە، سێ ئەرکێن سەرەکی هەنە، بەلاڤکرنا رەوشەنبیری و هشیاریێ، گەهاندنا گازندە و دەنگێ خەلکی و ئاشتیا جڤاکی، ئەڤرۆ میدیا کوردی ژ ڤان هەرسێ ئەرکان دویرکەفتیە و کەفتیە بن کاریگەریا سۆسیال میدیایێ و ئەو راگەهاندنێ ئاراستەدکەت.
میدیاکار و دەزگەهێن مە، هەمی کار بۆ زێدەکرنا لایک و فۆلۆ و ڤیۆیێن خۆ دکەن، بلا ل سەر کیستێ بابەتەکێ نە جهێ گرنگیدانێ ژی بیت، ئەڤە ژی وەدکەت میدیا ب چاڤەکێ دی بهێتە دیتن و ژ هەرسێ ئەرکێن خۆ یێن ل سەری مە ئاماژە بۆ کری دویرکەڤیت و ببیتە ئێخسیرا لایک و ڤیۆ و فۆلۆیێن تۆرێن جڤاکی.
لەوما ئەگەر هەر چ زویە میدیاکار و دەزگەهـێن میدیایێ کار بۆ ڤەگەراندنا ئەرکێ خۆ نەکەن کو بشێن جڤاکی ئاراستەکەن و رەئیا گشتی چێکەن، ل نێزیک دێ فاتیحا دوماهیێ ل سەر هێتە خواندن و سۆشیال میدیا دێ ب تەمامی بۆشاییا وێ تژی کەت.
