جڤاتا وەزیرێن هەرێما کوردستانێ جاره‌كا دی خواستا هەرێما کوردستانێ بۆ چارەسەرکرنا کێشێن ل گەل بەغدا دوپات دكه‌ت و داخواز دكه‌ت هه‌تا پەسه‌ندکرنا بودجەیێ گشتی یێ سالا 2023 ێ، حکومەتا عێراقێ پشكا بودجەیێ هەرێما کوردستانێ بهنێریت.
ئەڤرۆ چارشەمبی، 21-12-2022 ێ، جڤاتا وەزیرێن هەرێما کوردستانێ کۆمبوویه و د بەشه‌كێ وێ کۆمبوونێ دا كو ب سەرپەرشتییا مەسرور بارزانی، سەرۆکێ جڤاتا وەزیران برێڤەچوو، حکومەتێ پێشوازی ل بڕیارا حەفتییا بوری یا جڤاتا وەزیرێن عێراقێ کر بۆ هنارتنا 400 ملیار دیناران بۆ هەرێما کوردستانێ.
حکومەتا هەرێما کوردستانێ، وەزارەتا دارایی و ئابووری راسپارد د دانوستاندنێن به‌رده‌ام دابن ل گەڵ حکومەتا عێراقێ داكو بزووترین ده‌م رێکارێن هنارتنا وان پاران یا بەردەوام بیت “بۆ هندێ بێخنه خزمەتا خەرجی یێن گشتی یێن هەرێما کوردستانێ.”
جڤاتا وەزیرێن هەرێما کوردستانێ بڕیاردا پشتی بهینڤه‌دانێن سەرێ سالێ، شاندێ هەرێما کوردستانێ کۆمبوونان ل گەل حکومەتا فیدرالی “چڕ بکەن ب ئاراستەیا بەردەوامبوونا جێبەجێکرنا یاسایێن بودجەیێ سالا 2021 ێ و هنارتنا پشكا بودجەیێ هەرێما کوردستانێ” هه‌تا پڕۆژەیاسایێ بودجەیێ فیدرالی یێ عێراقێ بۆ سالا 2023 ێ ژ لایێ جڤاتا نوونەرێن عێراقێ ڤه پەسەند دكه‌ن.
