رێکكەفتن بۆ ئەنجامدانا ھەلبژارتنێن جڤاتێن پارێزگەھان ھاتیيە کرن

ئاژانسا خانی ، تایبەت:

بڕیارە ل دووماھییا سالا بهێت ھەلبژارتنێن جڤاتێن پارێزگەھان ل عێراقێ بھێنە ئەنجامدان و پەرلەمانتارەکێ پارتی ژی ئاشکرا کر، پارتی دگەل ئه‌نجامدانا ھەلبژارتنانە و دێ پشکدارییەکا بھێز کەت.

شێروان دوبەردانی، ئەندامێ لیژنا ھەرێم و پارێزگەھان ل په‌رله‌مانێ عیراقێ بۆ ئاژانسا خانی دیار کر” ھەرسێ سەرۆکاتیێن عێراقێ بڕیاردایە ل سالا بهێت ھەلبژارتنێن جڤاتێن پارێزگەھان بهێنه‌ كرن و ئەم ژی وەک پارتی دگەل ئه‌نجامدانا وان ھەلبژارتناینه‌، ب تایبەتی ل پارێزگەھێن کورد تێدا وەکی نەینەوا و کەرکووک و دیالا.

ناڤهاتی گۆت ژی” ھەلویستێ پارتی یێ خویایە بۆ ئەنجامدانا ھەلبژارتنان و دێ بەرھەڤی ھێنە کرن د دەمێ خوە دا، چونکی ئەم باوەرین ھەبوونا جڤاتێن پارێزگەھان دێ کارەکێ باشبیت بۆ دووڤچوونا کارێن حوکمەتێ ل ھەموو پارێزگەھان، ئەگەر جڤاتێن پارێزگەھان ھەبن ئەڤ ھەموو تەعریب و کارێن نەقانوونی ناھێنە ئەنجامدان.

ژلایێ خۆڤە ژی عارف حەمامی ئەندامێ لیژنا قانوونی ل پەرلەمانێ عێراقێ گۆت” رێکكەفتن دناڤبەرا لایەنێن سیاسی ھاتییە کرن بۆ ئەنجامدانا ھەلبژارتنێن جڤاتێن پارێزگەھان و بڕیارە ل مەھا 10 یا سالا بهێت بھێنە ئەنجامدان و لدووڤ قانوونا سالا 2013 ێ دێ ئەو ھەلبژارتن ھێنە ئه‌نجامدان.