سەرۆکوەزیرێن عیراقێ، ژ ئەگەرێ هێرشێن ڤێ دوماهیێ یێن کەرکووک و دیالە، چەند بڕیارەک دەێخستن، ژ وان ژی گۆهڕینا پلانا لەشکەری یا بەرهەنگاربوونا داعش و ئامادەییا سەربازان ل وان سنوورێن کو د ستویێ وان دانە.
رۆژا 21 کانوونا ئێکێ یا 2022، محەمەد شیاع سوودانى، سەرۆکوەزیر و فەرماندێ گشتییێ هێزێن چەکدار یێن عیراقێ دگەل سوپا سالار و جێگرێ فەرماندەی یێ ئۆپەراسیونێن هەڤپشک و چەند بەرپرسێن دی یێن لەشکەری و ئەمنی یێن عیراقێ کۆمبوو، بۆ گوتوبێژکرنا وان هێرشێن کو ل ڤان دوماهیان ل کەرکووک و دیالە هاتینە کرن.
نڤیسینگەهاڕۆژنامەڤانی یا محەمەد شیاع سوودانی راگەهاند، سەرۆکێ وەزیران د وێ کۆمبوونێ دا چەند ىڕیار بۆ رێگیریکرن ل دوبارەبوونا وان هێرشان دەرێخستن، ژ وان ژی داخواز ژ فەرماندێن لەشکەر کر، هەلسەنگاندنێ بۆ پلانێن خۆ یێن لەشکەری بکەن و تەکتیکێن خۆ یێن لەشکەری ل وان دەڤەران بگۆهرن یێن کو پاشماییێن ڕێکخراوا تیرۆرستی یا داعش تێدا د چالاکن و شێوازەکێ نە یێ دیار پەیڕەو بکەن بۆ بەرهەنگاربوونێ.
ل گۆرەی بڕیارێن سوودانی، پێدڤییە فەرماندێن لەشکەری ل وان دەڤەران ئامادەببن یێن ل ژێر بەرپرسیارەتیا وانن یان ژی نێزیک ببن ژ ئەفسەر و کارمەندێن خۆ ژ بۆ هندێ مورالا وان بلند بکەن و ب شێوەیەکێ مەیدانی و ڕاستەوخۆ ئاگەهداری پلان و بجهئینانێ بن.
