ڤۆلۆدیمێر زیلینسکی گەهشتە ئەمریکا

ئاژانسا نووچەیێن فڕانس پرێس بەلاڤکریە’ ڤۆلۆدیمێر زیلینسکی، سەرۆکێ ئۆکراینا گەهشتە ئەمریکا.

 ل گۆرەی زانیارییێن وێ ئاژانسێ، بڕیارە زیلینسکی دگەل جۆ بایدن، سەرۆکێ ئەمریکا کۆمببیت، کو دبیتە ئێکەم سەرەدانا سەرۆکێ ئۆکراینا بۆ ئەمریکا ل پشتی سەرهلدانا شەڕێ ئۆکراینا و ڕووسیا ل 24 شوباتا بووری

پێشتر وەزیرێ دەرڤە یێ ئەمریکا ڕاگەهاندبوو، واشنتن دێ سیستەمێ بەرەڤانییێ یێ ئەسمانی یێ پاتریوت دەتە ئۆکڕاینا.

ئەنتۆنی بلینکن وەزیرێ دەرڤە یێ ئەمریکا گوت: “850 ملیۆن دۆلار وەکی هاریکارییا ئەمنی و ئێک ملیار دۆلار بۆ پێسڤەبرنا بەرەڤانییا ئاسمانی دێ ب ئۆکراینا هێنە دان.”

بلینکن ئاماژ کریە ژی، وەلاتێ وی دێ هاریکارییا نوی یا لەشکەری دەتە ئۆکراینا و بڤێ چەندێ ژی سەرجەمێ گشتی یێ هاریکارییێن لەشکری یێن واشنتن بۆ کیێڤ دێ گەهیتە 21 ملیار و 900 ملیۆن دۆلاران.