ل سلێمانییێ پێنج كه‌سان كچه‌ك ره‌ڤاند و ده‌ستدرێژییا سێكسى ل سه‌ر كر

رێڤه‌به‌رییا پۆلیسێن پارێزگه‌ها سلێمانییێ ئاشكراكر، پێنج كه‌سان كچه‌ك ره‌ڤاند و پاشان ده‌ستدرێژییا سێكسى ل سه‌ر كر و حه‌فت كه‌س ل سه‌ر ئه‌ڤێ كه‌یسێ هاتنه‌ ده‌سته‌سه‌ركرن.

دراگه‌هاندنا پۆلیسێن سلێمانییێدا هاتییه‌، پشتى وه‌لاتییه‌كى سكالایه‌ك ل رێڤه‌به‌رییا پۆلیسێن پارێزگه‌ها سلێمانییێ تۆماركرى كو كچه‌ك دیار نه‌مایه‌، پۆلیسان لێكۆلین ل سه‌ر دیار نه‌مانا وێ ده‌ستپێكر، و ده‌ركه‌ت وێ كچێ ژ ئه‌گه‌رێ به‌لاڤبوونا ڤیدیویه‌كێ ل تیكتوكى مال بجهـ هێلانه‌ و ژ ترسا ره‌ڤییه‌.

پۆلیسێن سلێمانییێ ئاماژه‌ ب هندێ دا، لێكۆلینێ ده‌ستپێكرییه‌ و شیان دوو تومه‌تباران ده‌سته‌سه‌ربكه‌ن كو ڤیدیو ژلایێ وانڤه‌ هاتبوو به‌لاڤكرن، پشتى ده‌مه‌كێ كێم ئه‌و كچا به‌رزه‌بووى ده‌ركه‌ڤت، و دماوێ به‌رزه‌بوونێدا ژلایێ پێنج تومه‌تبارانڤه‌ هاتییه‌ ره‌ڤاندن و دناڤا شوقه‌یه‌كێدا ده‌ستدرێژییا سێكسى ل سه‌ر هاتییه‌ كرن.

د پشكه‌كا دییا راگه‌هاندنێدا هاتییه‌، لێكۆلینێن پۆلیسان دبه‌رده‌وامبوون هه‌تا شیاین وان تومه‌تباران ده‌سته‌سه‌ربكه‌ن، نوكه‌ هه‌موو تومه‌تبار ب ناڤێن ( ب، خ، ن ژ دایكبوویێ 2005ێ – م، ر، ر ژ دایكبوویێ 2002ێ – م، م، ق ژ دایكبوویێ 1999ێ – گ، م، م ژ دایكبوویێ 1988ێ – ب، ب، ح ژ دایكبوویێ 1995 – چ، ع، ح ژ دایكبوویێ 1993ێ – ر، س، س ژ دایكبوویێ 1988ێ ) ب بریارا دادوه‌رى و ل دووڤ مادده‌یێ 430 ژ قانوونا سزایێن عیراقێ هاتینه‌ ده‌سته‌سه‌ركرن، وان دانپێدان ب تاوانا خوه‌ كرییه‌ و لێكۆلین دگه‌لدا یا به‌رده‌وامه‌.

جهێ ئاماژێیه‌ پشتى ئه‌و كچه‌ ژلایێ هێزێن پۆلیسانڤه‌ هاتییه‌ دیتن، ب بریارا دادوه‌رى ره‌وانه‌ى نه‌خۆشخانێ هاتییه‌ كرن بۆ وه‌رگرتنا چاره‌سه‌رییا نوشدارى و پشكنینێن پێدڤى، و نوكه‌ ب بریارا دادوه‌رى ره‌وانه‌ شێلته‌ر ( خانه‌یا دالده‌دان ) یا سلێمانییێ هاتییه‌كرن.