ل شنگالێ گۆرەکێ دی یێ بکۆم هاتە دیتن

ئاژانسا خانی ، باسم قاسم:

چالاکڤان ناجی حەجی تایبەت بۆ ئاژانسا خانی گۆت، ئەڤرۆ ئێكشه‌مبی 8 / 1/ 2023 ێ” ل کۆمه‌لگەها سیباشێخدرێ گۆرەکێ دی یێ بکۆم هاتە دیتن و ئەو ژی دزڤریت بۆ سەردەمێ داعشێ ل دەمێ سێ تەباخا سالا 2014ێ و هێرشا وان بۆ سەر شنگالێ.

ناڤهاتی گۆت ژی، بەردەوام گۆرێن بکۆم ل قەزا شنگالێ دهێنە دیتن و ژمارا وان بەرەڤ زێدەبوونێ ڤە دچیت و ئەو گۆرێ ئەڤرۆ هاتیە دیتن ل سیباشێخدرێ یە د باشوورێ چیایێ شنگالێ و هەتا نوكە نەهاتییە زانین چەند رووفات دناڤ وی گۆری دانە و ئەڤه‌ دبیتە گۆرێ هەشتێ یێ بکۆم ل کۆمه‌لگەها سیباشێخدرێ دهێتە دیتن.

ئه‌و ژی گۆت، ئەم داخواز دکەین ئەو گۆره‌ ژ لایێ رێکخراوان ڤە بهێتە پاراستن و هەر د هەمان دەم دا مە جهێن پەیوەندیدار ئاگەهدارکرینە هەتا کو دەمێ وی بهێت بهێتە هەلدان.