عیراق: مالکی هشیارییێ لدوور سەرهلدانا خۆپیشاندانان ددەت

نوری مالكی، سه‌رۆكێ ئیئتیلافا ده‌ولەتا یاسا، هشیارییێ لدوور دوبارە سەرهلدانا پێلەکا دی یا خۆ پیشاندانان ل عیراقێ ددەت.

د چوارچووڤێ پێشکێشکرنا گوتارەکێ دا ل سالڤەگەرا ژ دایکبوونا حەسرەتێ زەهرا(ڕازەمەندیا خودێ لسەر بیت)، نوری مالکی، سەرۆکێ ئیئتیلافا دەولەتا یاسا ڕاگەهاند، پێشبینیکریە دووبارە خۆ پیشاندان ل عیراقێ دەستپێبکەن، داخوازکر ژی، بلا دەرفەت ب حکومەتا محەمەد شیاع سوودانی بهێتە دان، ژ بۆ هندێ کارێ خۆ بکەن، مالکی د گوتارا خۆ دا هندەک لایەن تۆمەتبارکرن، کو دەست د بلندکرنا بهایێ دۆلاری دا هەیە ل عیراقێ.

هەر وەسا، مالکی گوت:” هندەک لایەنان پەیوەندی دگەل دەرڤە هەنە، ژ بۆ هندێ دووبارە پێلەکا دی یا خۆ پیشاندانان ڕێکبێخن و حکومەتا نوکە یا عیراقێ ژناڤ ببەن.” داخواز ژ عیراقیان ژی کر، رێکێ بدەن حکومەتا نوکە کارێ خۆ بکەت، کو سێ مەهە هاتیە پێکئینان.

ئاشکرا کر ژی، حکومەتێ پێدڤی ب چەند سالان هەیە، تا ئاریشە و کێموقکاسی چارەسەرببن، نابیت لەز ل حکومەتێ بهێتە کرن، کو هێشتا بودجە نە هاتیە پەسەندکرن.

مالکی گوت ژی:” هندەک کەس هیڤی خوازن دۆلار بڤی ڕەنگی بمینیت، بتنێ دا کو زیان بگەهیتە وەلاتییان.”

سەرۆکێ ئیئتیلافا دەولەتا یاسایێ ئاماژەکر،” ئەم هەر خۆ پیشاندانەکێ رەت دکەین، کو کارتێکرن بۆ سەر ژیانا خەلکی و بەڕژەوەندییا گشتیی هەبیت، کو ژ ئەگەرێ وێ ئاشووپ ل وەلاتی دروست ببیت.”

مالکی گوتی:”پشتی زەحمەتەکا مەزن حکومەت یا هاتیە پێکئینان د دەمەکی دا کو عیراق لسەر خەتەکا شەڕێ نافخۆ دابوو.”