مەسرور بارزانی، سەرۆكێ حكومەتا هەرێما كوردستانێ ئەڤرۆ پەیامەكا پیرۆزباهیێ ب هەلكەفتا دامەزراندنا كوردستان تیڤی بەلاڤكر و پیرۆزباهی ل هەمی رێڤەبەر و كارمەندێن دەزگەهێ سەتەلایتا كوردستانێ كر و هیڤیا پێشكەفتنێ بۆ خواست.
مەسرور بارزانی ڕاگەهاند، كوردستان تیڤی وەك ئێكەم كەنالێ تەلەڤزیۆنا ئاسمانییا كوردستانێ د ئاخا كوردستانێدا دەست ب پەخشی كرییە كو رۆلەكێ گرنگ و دیار د گەهاندنا پەیاما گەلێ كوردستانێ ب شێوەكێ ڕاستگوی و پیشەی هەیه.
سەرۆكێ حكومەتا هەرێما كوردستانێ دیاركر، كوردستان تیڤی د نوكەدا وەك دەزگەهێ سەتەلایتا كوردستان د كارێ میدیایێدا بەردەوامە بۆ گەهاندنا پێزانینێن راست و خزمەتكرنا كەلتوور و زمان و هونەرێ كوردی، هەروەسا بجهئینانا كارێ نیشتیمانی و نەتەوەیی د گرنگییا هزرا نیشتیمانپەروەری و پێكڤەژیان و داكۆكیكرن ژ ماف و دەستكەفتێن گەلێ كوردستانێ.
