ئهڤرۆ چارشەمبی، مهكتهبا سیاسییا پارتییا مه ب سهرۆكاتییا سهرۆك مهسعود بارزانی كۆمبوونا خوه یا ئاسایی ئهنجامدا” سهبارهت پێشهات و گوهۆرینێن سیاسی و حكومی (ئیداری) یێن ههرێمێ و ڤێ دهڤهرێ، د وێ كۆمبوونێ دا پارتیییا مه تهكهزی ل چارهسهرییا ئاریشه و ئالۆزی یێن كو پهیوهندی ل گهل ئێكهتی نیشتمانی كوردستان ههین کرینە لدووڤ پرهنسیپ و مادێن رێككهفتنا سیاسی و ئیداری دناڤبهرا مه دا و كارناما كابینا نههێ یا حکومەتێ كو ب رازیبوونا ههردو ئالییان هاتییه نڤێسین و ئیمزا كرن.
د وێ کۆمبوونێ دا ئهڤ تهوهره هاتنه بهحس كرن:
تهوهرێ ناڤخۆیێ كوردستانێ: پارتییا مه ل روانگهیا پاراستنا دهستكهفتێن گهلێ مه كو ب خوین و خهباتێ ب دهستڤه هاتینه و ههستکرن ب بهرپرسیارهتییێ و ئهزموونا ب دههان سالێن خهباتێ ژ پێخهمهت ماف و ئارمانجێن مه یێن رهوا، ههروهسا ژ پێخهمهت پاراستنا قهوارێ ههرێما كوردستانێ و ئاسایشا وهلاتییان، ههردهم كۆمبوون وگوتۆبێژ بۆ چارهسهرییا ئاریشان و گرفتان ب رێیا دروست و راست زانییه، ههروهسا ل روانگهیا باوهڕی بوونێ ب پێكڤهژیانا نهتهوهیی و ئایینی و سیاسی و پاراستنا مافێ مرۆڤی، بزاڤا دروستكرنا پرا پهیوهندی و پێكڤه كاركرن و دروستكرنا باوهرییێ دایه.
بۆ ڤێ مهرهمێ و ب پڕاكتیككرنا وێ باوهڕییێ و تێگههشتنا مه، بۆ ئێكڕێزییا گهلێ كوردستانێ بهرامبهر گوهۆرین و ئاریشان و بجهئینانا بڕیارا كۆنگری ١٤ێ یێ پارتیییا مه و بڕیارا سهرۆك مهسعود بارزانی، مه ڤهكرنا لاپهڕهكێ نوو د پهیوهندی یێن خۆ دا راگەهاند، بۆ كۆمبوونا دوقۆڵی ل گهل ئێكهتی نیشتیمانی كوردستان و د بهسڤا بروسكهیا وان دا ب ڕوونی مه ئاماژه پێدایه كو ههبوونا تێبینی و ئاریشان ب بروسكەیان و بهحسكرنێ د ڕاگههاندنێ دا ناهێته چارهكرن، بەڵکو ڕێیا سیاسی و مهدهنی و كۆمبوونا دوقۆڵی و بهحسكرن و دانوستاندن ل سه رههموو تێبینی و ئاریشان ب مهرهما دیتنا چارهسهرییێ، نوكه دوباره دكهین ئهم ل پارتی دیموكراتی كوردستان ئامادهینه بۆ كۆمبوون و گوتۆبێژ و چارهسهركرنا ئاریشان، ئهم ڤێ ب رێیا دروست و ههڤچهرخ دزانین کو ل گەڵ ئێكهتی نیشتیمانی و ههموو لایهنێن سیاسی یێن كوردستانی دێ دهست ب گوتۆبێژان كهین.
تهوهرێ حكومهتێ: ههروهك د خالا (٤) ێ یا رێككهفتنا سیاسی یا دناڤبهرا پارتییا مه و ئێكهتییێ دا هاتی، دڤێت ئهم ههردو ئالی پشتهڤانییا حكومهتا ههرێما كوردستان بكهین ژ ههموو لایهكی ڤه، ب مخابنی ڤه نهكو پشتهڤانییا حكومهتێ نههاته كرن، بهڵكو بهرۆڤاژی گهلهك ئاستهنگ بۆ دروستكرن و نوكه ئاریشه ب شێوهكێ نیشا وهلاتی یێن كوردستانێ دهێنه دان كو ئهڤ بابهته ل گهڵ كهساتییا سهرۆكێ حکومەتێ یە، ل ڤێرێ رادگههینین ئهم ل دژی ب شهخسیكرنا ئاریشاینه و ڤان جۆره بزاڤان ڕهتدكهین. سهرۆكێ حكومهتێ لدووڤ ماده و بڕگێن رێككهفتنا سیاسی و ئیداری، ههروهسا كارناما كابینا نههێ ڕهفتار كرینه، ئهڤ بزاڤێن وان بۆ ڤهشارتنا وان كێماسییانه یێن كو ئهو دروست دكهن و ڕێكێ ل چاكسازی و شهفافیهتێ دگرن، ئهڤ جۆره ڕهفتار و مامهڵهكرنه د كاروبارێن حكومهتێ دا خۆڤه دزینه ژ ڕێككهفتنا سیاسی و ئیداری و كارناما كابینا نههێ” كو ههرسێك ب ههڤپشكی و ب پهسهندا مه ههردو ئالییان هاتییه ئاماده كرن و ئیمزا كرن.
كۆمبوونا مهكتهبا سیاسی ب ههموو شییانێن خۆڤه پشتهڤانییێ ل ههڤاڵ مهسرور بارزانی سهرۆكێ حكومهتا ههرێما كوردستانێ و كابینا وی دكهت، رێیا چارهسهرییا ئاریشان بهردهوامیدانه ب گوتۆبێژان ل كۆمبوونێن جڤاتا وهزیران نهكو پشتگوهخستن و ب كارئینانا دهزگههێن راگههاندنێ.
تهوهرێ ههڵبژارتنا پهرلهمانێ كوردستانێ: مه گهلهك بزاڤ كرن، مه پڕۆژه ئامادەکر و پێشكێشی ههوه کر د وان كۆمبوونێن ههڤپشك كو بهڕێز سهرۆكێ ههرێمێ پێك دئینان و سهرپهرشتییا وان دكر، هەروەسا وان كۆمبوونێن كو نوونهرا UNپشكداردبوو، بهلێ مخابنی دووماهی جار ب نهچاری و ژ پێخهمهت پاراستنا قهوارهیێ ههرێمێ مه بژاردهیا درێژكرنا ژییێ پهرلهمانی پهسهندكر، نوكه مهكتهبا سیاسی تهكهزییێ ل هندێ دكهت” كو دڤێت پهرلهمانێ كوردستانێ ب زووترین دهم كۆمبوونێن خۆ یێن ئاسایی ئهنجام بدهت و ڤان گاڤان بهاڤێژیت:
– راستڤهكرنا یاسایا ههلبژارتنان ئهو لهوییهتا وی بیت ل گەل چهسپاندنا بابهتێ چار بارزنهیی و ب كارئینانا تۆمارا بایۆمهتری یا داوی ههڵبژارتنێن جڤاتا نوونهرێن عێراقێ.
-ههڤتهریب ل گهڵ دهنگدانێ ل سهر راستڤهكرنا یاسایا ههڵبژارتنێن كۆمسیۆنا سهربهخۆیا ههڵبژارتن و ڕاپرسیێ بهێته كاراكرن و پۆسته و ڤالاهی یێن دناڤا كۆمسیۆنێ دا بهێنه پركرن.
-ههروهسا داخوازێ ژ ههموو لایهنێن سیاسی یێن كوردستانی دكهین پشتهڤان بن بۆ ئهنجامدانا ههڵبژارتنێن پهرلهمانێ كوردستانێ ل سالا 2023 ێ” ل وی دهمێ بۆ دهیته دیار كرن.
سهبارهت حكومهتا فیدڕالی و پهیوهندی یێن هەولێر و بەغدا: ئهم وهكو پارتی دیموكراتی كوردستان ل گهل دروستكرنا پهیوهندی یێن دروست و ئاساینه دناڤبهرا حكومهتا ههرێمێ و حكومهتا فیدڕاڵی لدووڤ ماده و بڕگێن دهستووری بۆ چارهسهرییا ههموو وان ئاریشێن نوكه ههین و ئهوێن دهێنه پێش ژ لایێ یاسایی و سیاسی و شایستێن دارایی، باشتركرنا پهیوهندییان و ئهڤ ڕێبازه دێ پتر خزمهتا ههموو گهلێ عێراقێ ب شێوهكێ گشتی كهت و ههموو بابهت ب ڕێككهفتنا سیاسی و ئیدارا دهوڵهتێ و كارناما كابینا حکومەتا فیدراڵ ب ڕوونی ئاماژە پێ هاتینه دان هاتینه چهسپاندن، ب پێدڤی دزانین ئیلتیزام ب ڤێ رێككهفتنێ بهێته كرن و بكهڤیته د بیاڤی بجهئینانێ دا.
