ل سەر ڕاسپاردەیا مەسرور بارزانی سەرۆکێ حکومەتا هەرێما کوردستانێ، دەستەیا وەبەرهێنانێ دێ دیڤچوونێ بۆ ئاریشە و ئاستەنگێن د کەڤنە د ڕێکا پرۆژەیێن وەبەرهێنانا بیانیدا ل هەرێما کوردستانێ کەت.
ئەڤرۆ 25 کانوونا دووێ 2023، دەستەیا وەبەرهێنانێ ل هەرێما کوردستانێ د چوارچوڤێ ڕاگەهاندنەکێ دا ئاماژە کریە، دكتۆر محەممەد شوکری سەرۆکێ دەستەیا وەبەرهێنانێ، هەڤپشکیا ئومێد خۆشناو، پارێزگارێ هەولێرێ و ئۆلیڤیێ دیکۆتینی کونسوڵێ گشتی یێ کۆمارا فەرەنسا و خالد ئەلشەمرانی، جێگرێ کونسوڵێ عەرەبستانا سعودیە ل هەرێما کوردستانێ، سەرەدانا کارگەها (صافی دانون) ل هەولێرێ کر، کو وەبەرهێنانەکا هەڤپشک دناڤبەرا هەردوو وەلاتێن (سعوودیه و فەرەنسا) ژ ساڵا 2014 بەرهەمێن خۆ ل هەرێما کوردستانێ و گشت پارێزگەهێن دی یێن عیراقێ د ئێخیتە د بازاری دا.
هەر وەسا د ڕاگەهاندنا دەستەیا وەبەرهێنانێ دا هاتیە بەرچاڤکرن، ئەڤ پێنگاڤە پشتی پشکداریکرنا سەرۆکێ حکومەتا هەرێما کوردستانێ د کۆربەندێ ئابووری یێ داڤۆس دا دهێت ل وەلاتێ سویسڕا ، کو دیدار دگەل چەندین کەسایەتییێن سیاسی، ئابوورناس، بازرگان، مەزنە بەرپرسێن وەلاتان ئەنجامدا، هەڤدەم سەرۆکێ جڤاتا وەزیران، دەستەیا وەبەرهێنانێ و سازی و لایەنێن پەیوەندیدار یێن حکومەتا هەرێمێ ڕاسپاردن، ڤەکۆلینێ لسەر ڕەوشا وەبەرهێنەر و وەبەرهێنانا بیانی ل هەرێما کوردستانێ بکەن و ئاریشەیێن وان بۆ چارەسەر بکەن و سەرەدانا وان بکەن.
کۆمپانیا (صافی دانون) ل هەرێما کوردستانێ خودان پڕۆژەیێ پیشەسازی یێن خوارنێ یە، کو پڕۆژەیەکێ وەبەرهێنانێ یە ل سال ( 2013 ) دا ژ لایێ دەستەیا وەبەرهێنانێ ڤە مۆلەت پێ هاتیە دان و 75% کارێ وێ یێ دەستی و خومالیە.
