کۆڤان حسێن
دبیت گەلەك ژ دوژمنان کو مرۆڤی د هزرا خۆدا مەزن كرین، ب وێ درندایەتیێ نەبن, ژ دبەنكوكا خۆدا دبیت هەر دوژمن نەبن ل سەر ئاستێ جڤاكی و كەسی. زۆرن ئەو هەلویستە كو مرۆڤ جارا دووبارە راستڤەكرنا هندەك تێهەتێن خۆ بكەتن. كارەسات نە ب دلێ كەسێ نە و نەكەسێ دەستكاری تێدا هەیە و سنور ناسناما ژی ل بەرچاڤ ناگریت. بەلێ وەختا رێ ددەن هینگێ دبیرا مرۆڤیدا رەنگە بیڤەلەرز دیاربن.
تویتەكا پەرلەمانتارەكێ تورك ژ راستی گەلەك بالا من راكێشا دەما گۆتی: د شەڤەكا نەوەختدا (كورد و یۆنانی) دهەوارا توركیایێ هاتن. ما كینە نەژادپەرستییا تركان ب سالانە كوردا و ئەرمەنان و یۆنانیان ب هوڤ و درندە و تیرۆرست وێنە دكەتن و ب سالانە شەقامەكێ لسەر كەرب و كینێ هەتا د مینبەرێن مزگەفتان ڤە ژی بەلاڤدكەن.
ئەرێ ژ راست مللەت دوژمنێن ئێكن یان ژی تەخا سیاسی و بەرژەوەندی ئاگرێ دوژمنكاریێ خورت دكەن. ما كی پرسیارا تركا یان عەرەبا كریە د ریفراندۆمەكا ئازاددا كا ژ راست ب دوژمن دبینن؟! یان بەروڤاژی. كارەستا ل باكورێ كوردستانێ و رۆژئاڤا روودای ژ راست جەرگ برە بەلێ هندەك وێنە هەستا مرۆڤایەتییێ نیشاندان هەمی نەژاد پەرستییا توركیا نەبوو رێگر هەرێما كوردستانێ هاریكاریا رەوانەی (عەفرینێ و جەندەریسێ) بكەتن و نەبوو ئاستەنگ كوردێن باشور و كوردێن باكوور بچن وەك چەوا پێشمەرگە رۆژەكێ چوونە كوبانێ. نەبوو رێگر یۆنانی و ئەرمەن و كورد جیرانێن تركیا ژ بەری هەمیان بگەهەنە سەر كاڤلێن قوربانیان. كارەسات و روودان ئاماژەكا نازكە بۆ كەسێن مللەتێن ژ ئاستێ نزم یێ مرۆڤایەتییێ بیر بكەن. هەمی نەژادپەرستی بەرامبەر هەستەكێ مرۆڤانییێ د شەرمینە. هاتنا یۆنانی و كوردان بۆ سەركاڤلێن خەلكێ ناسناما توركیا هەی. ژ راستی وێنەك جوان بوو بەلكی رۆژەكێ ژ كەربا نەژاد پەرستەكێ پیچەكێ كێم بكەتن و مرۆڤایەتیێ بلندتر ژ هندەك بهایێن بێ رامان مرۆڤا خۆ تێدا ئاسێ كرن. بۆ من سەیر بوو كو تركیا ب وێ ئابوورا مەزنا خۆ ڤە و ب وان شیانێن مەزنێن هەین داخوازا هاریكارییێ ژ كوردستانێ بكەتن ژ راستی یا چاڤەرێكری نەبوو، بەلێ مەزنیا كارەساتێ هەمی (اعتبارەك) ڤەدا ئالیەكێ و تركیا دەرگەهێن خۆ سەر پشت كرن ژ بەری هەمیان بۆ كوردا و یۆنانی و ئەرمەنان بگەهنە جهێ روودانێ بێ سیاسەت. جارا د كارەساتاندا دەولەت و سازی ژی دووبارە بیرا خۆ دكەن و سەر ژنوی هندەك تێگەهان پێناسە دكەن و رەنگە ل داهاتیدا ژی ئەڤ دبلۆماسیا كارەساتا پرسێن سیاسی ژی سڤك بکەتن.
