مه‌سرور بارزانى سه‌روكێ حكومه‌تا هه‌رێما كوردستانێ ل ده‌رگه‌هێ باژێرێ هه‌ولێرێ رێكا دهوك هه‌و‌لێر پێشوازی ل تیما هه‌وارهاتنا هه‌رێما كوردستانێ كر و گوتاره‌كا گرنگ ژى پێشكێشكر كو ئه‌ڤه ده‌قێ وێیه :
بناڤێ خودایێ مه‌زن ودلوڤان
ل ڤێرێ من دڤێت ب ناڤێ خه‌لكێ كوردستانێ بخێرهاتنه‌كا گه‌رم ل وان خووشك برایێن خوشتڤى بكه‌م یێن هه‌ر ل روژا ئێكێ یا وێ ئه‌ردهه‌ژێ كو ل باكورێ كوردستانێ و روژئاڤایێ كوردستانێ و جهێن دی ل توركیا وسوریا رووداى، دهه‌وارا وى خه‌لكێ لێقه‌وماى چووین، تیم پێكهاتبون ژ تیمێن هه‌وارهاتنا بله‌ز ل وه‌زارتا ناڤخۆ و تیما ساخله‌مییێ و هه‌وارهاتنا وه‌زاره‌تا ساخله‌مییێ و ده‌زگه‌هێ خێرخوازییێ بارزانى و هه‌یڤا سوور یا عیراقى لقێ هه‌ولێرێ، كو بێگومان وه‌كو ئێكه‌م تیما قوورتالكه‌ر گه‌هشته وی خه‌لكێ لێقه‌وماى كو ب مخابنیڤه گه‌له‌ك كه‌سان گیانێ خوه ژ ده‌ست دا و گه‌له‌كێن دى ژى دبن خانیێن خوه‌دا مان، هین شیان بگه‌هنه وێرێ و ده‌ستێ هاریكارییێ بۆ درێژبكه‌ن، راستى وه سه‌رێ مه بلند كر شانازییێ ب وه دبه‌ین وده‌ستخۆشییێ ل وه دكه‌ین بخێرهاتنا گه‌رما هه‌وه هه‌مووان دكه‌ین و خودێ خێرا وه بنڤیسیت بو وێ چه‌ندا وه كرى، وه دووپاتكر كو ئه‌م خه‌لكه‌كێ خێرخواز و ئاشتیخوازین ئه‌وا دشیانێن مه‌دابیت ده‌ستێ هاریكارییێ بۆ خووشك و برایێن مه ل هه‌ر جهه‌كێ جیهانێ بن درێژ بكه‌ین هه‌ر كورده‌كێ خودان وژدان ل هه‌ر جهه‌كێ جیهانێ بیت سه‌رێ وى ب وه بلنده و شانازییێ ب وه دبه‌ت.
