پشتی ل 17 هه‌تا ئەڤرۆ 19 شواتا 2023 ێ، نێچیرڤان بارزانی، سەرۆكێ هەرێما كوردستانێ، پشكداری د كۆنفرانسێ ئاسایشا میونشن دا كری، ئەڤرۆ ئێكشه‌مبی دووماهی ب بەرنامە و دیدار و كۆمبوونێن وی هات.
د دەمێ سێ رۆژان دا ل کۆنفرانسێ میۆنشن ل ئه‌لمانییا نێچیرڤان بارزانی” ل گەل هژمارەکا سەرکردە و وەزیرێن دەرڤە و بەرپرسێن بلند یێن وەلاتان کۆمبوویە، ژ وان ژی سەرۆک کۆمارێ ئازەربایجانێ، سەرۆکوەزیرێن پۆلۆنیا، ئەرمەنستانێ، عیراقێ، وەزیرێن دەرڤە یێن ئەمریکا، بریتانییا، ئیتالییا، ڤاتیکان، نەرویج، قەتەر، کوێت، ئۆردن، سەرۆکا کۆمسیۆنا ئێکەتیا ئورۆپا، جێگرێ سەرۆک و بەرپرسێ بلند یێ کاروبارێن دەرڤە و سیاسەتا ئەمنی یا کۆمسیۆنا ئێکەتیا ئورۆپا، دو شاندێن کۆنگرێسێ ئەمریکا، هاریکارێ وەزیرێ بەرگرییا ئەمریکا بۆ کاروبارێن ئاسایشا نێڤدەولەتی، وەزیرێ دەولەتێ ل وەزارەتا هەماهەنگی و ئابووری و گەشەپێدانێ یێ ئەلمانییا، جێگرێ سەرۆکێ کۆمیتا کاروبارێن دەرڤە، شاندەکێ پەرلەمانێ ئەلمانییا، شاندێ گرۆپەکێ پەرلەمانتارێن پارتیا (SPD) یا ئەلمانی و چەندین کەسایەتی و ئاماده‌بوویێن دی کۆمبوویە.
د وان دیدار و کۆمبوونان دا رەوشا سیاسی و ئەمنی و ئابووری یا عیراق و هەرێما کوردستانێ، پەیوەندی یێن هەولێر و بەغدا و دانوستاندنێن چارەکرنا کێشێن وان، پەیوەندی یێن عیراق و هەرێما کوردستانێ ل گەل وەلاتێن جیهانێ بەحس کرینە.
بابه‌تێ وزێ و ئاسایشێ و بەرهنگاربوونا تیرۆرێ و چەند پرسێن دیتر جهێ گرنگییا ئامادەبوویێن وی كۆنفرانسی بوو، هاتینه به‌حسكرن.
