گۆتیرێسى سه‌ره‌دانا خوه‌ بۆ عیراقێ ب نایاب هژمارت

محه‌مه‌د شیاع سوودانى سه‌رۆكوه‌زیرێن عیراقێ و ئه‌نتۆنیۆ گۆتیرێس سكرتێرێ گشتییێ نه‌ته‌وه‌یێن ئێكگرتى، گوتوبێژا بابه‌تێن ئاواره‌، رووبرووبوونا گوهۆرینێن سه‌قاى و مافێ مرۆڤان كر.

نڤێسینگه‌ها سه‌رۆكوه‌زیرێن عیراقێ راگه‌هاندنه‌ك به‌لاڤكر و تێدا هاتییه‌، محه‌مه‌د شیاع سودانى سه‌رۆكوه‌زیرێن عیراقێ و ئه‌نتۆنیۆ گۆتیرێس سكرتێرێ گشتییێ نه‌ته‌وه‌یێن ئێكگرتى ل دۆر ئالۆزییێن ده‌ڤه‌رێ، گوهۆرینێن سه‌قاى و ژینگه‌هێ و ئابوورى، هه‌روه‌سا بابه‌تێ ئاواران كۆمبوون.

سوودانى د پرێسكۆنفرانسه‌كێ هه‌ڤپشكدا دگه‌ل گۆتیرێسى سوپاسییا هنارتییێ تایبه‌ت یێ نه‌ته‌وه‌یێن ئێكگرتى بۆ هاریكارى و هه‌ماهه‌نگییا دگه‌ل به‌غدا كر.

هه‌روه‌سا سوودانى دووپاتى ل هندێ كر، عیراق ژ قه‌یرانا سیاسى قۆرتالبوویه‌ و راگه‌هاند، حكومه‌تا عیراقێ كار بۆ چاره‌سه‌ركرنا ئاریشه‌یێن ژینگه‌هـ و ئابوورى كرییه‌.

ژلایێ خۆڤه‌ گۆتیرێسى سه‌ره‌دانا خوه‌ بۆ عیراقێ ب نایاب هژمارت، و پشته‌ڤانییا كۆمه‌لگه‌ها نێڤده‌وله‌تى د بیاڤێن سه‌قایى و ئاواره‌یاندا دووپاتكر.