نیزیكی هەیڤەكێ ب سەر كێمكرنا بهایێ دۆلاری ل هەمبەری دینارێ عیراقێ دەرباز دبیت و هێشتا ئەو بها ب تنێ ل بانكا ناڤەندی و فرۆكخانە و دەرگەهێن سنوری كاریگەریا خوە هەبوویە و ل بازاری ژی بهایێ 100 دۆلاران پترە ژ 150 هزار دیناران. بانكا ناڤەندییا عیراقێ بریار دایە رۆژانە سەدان ملیۆن دۆلاران ب بهایێ 130 هزاران بفرۆشیت و ل بازارێ ژی دڤێت ژ 132 هزار نەبووریت. لێ هێشتا ئەو بریار كارتێكرنا خوە ل بازاری نەكریە.
ئاژانسا خانی پەیوەندی ب شارەزایێ ئابووری و مامۆستایێ زانكۆیێ، دكتۆر كاوە عەبدولعەزیز كر ل دۆر وێ یەكێ ب چ رێك دێ دۆلارێ ئەمریكی ب بهایێ بانكا ناڤەندی كەڤیتە دەستێ وەلاتییان، ناڤهاتی راگەهاند ب تنێ ئێك رێك یاهەی كو بهایێ دۆلاری ل بازاری وەكو بهایێ بانكا ناڤەندی بیت، ئەو ژی كو وەلاتی راستەوخۆ بشێن دۆلاری ژ حكومەتێ بكڕن، ئانكو ئەو كۆمپانی و بانكێن د ناڤبەرا بانكا ناڤەندی و خەلكیدا هەنە نەمینن و خەلك ب شێن ب رێكێن جودا دۆلاری ژ بانكا ناڤەندی وەرگرن.
گۆت ژی، بۆ ڤێ یەكێ ژی چەندین رێكار هەنە، نڤیسینگەهـێن بانكا ناڤەندی ل هەمی پارێزگەهان هەبن، ل فرۆكخانە و دەرگەهێن سنوری ب وی بهای پارە بهێنە گهۆرین، هەروەسا كۆمپانییێن مەزن دۆلاری ب بهایێ فەرمی یێ بانكا ناڤەندی بفرۆشن، هەروەسا پشكەكا ئەو كۆژمێ پارەیێ بۆ كۆمپانیێن مەزن دچیت، ب بانكێن بازرگانی بهێنە دان.
گۆت ژی، ئەو بێ هیڤییە كو ب وی رەنگێ نوكە بهایێ دۆلاری ل بازاری وەكو بهایێ بانكا ناڤەندی لێ بهێـت و هەر دێ ب گرانی مینیت.
ئاژانسا خانی پەیوەندی ب پرۆژەیێن ئاكنجیبوونێ كر كو ل گۆری بریارەكێ پێدڤییە ئەو ژی ب بهایێ بانكا ناڤەندی سەرەدەریێ ل گەل شێوازێ قستێن وەلاتییان بكەن، هەر ئێك ژ كۆمپانیێن ئاریا ستی و كایار ستی ل دهۆكێ بۆ ئاژاسنا خانی راگەهاندن، هەتا نوكە بریارەكا ب وی رەنگی نەگەهشتییە وان و ئەو ئاگەهادار نینن ل دهۆكێ كار ب ئەڤێ بریارێ بهێـتەكرن.
