سه‌رۆكێ هه‌رێما كوردستانێ و وه‌زیرێ به‌ره‌ڤانییا ئه‌مریكا كۆمبوون

نێچیرڤان بارزانى سه‌رۆكێ هه‌رێما كوردستانێ و فه‌رمانده‌یێ گشتییێ هێزێن چه‌كدار دگه‌ل لۆیس ئۆستن وه‌زیرێ به‌ره‌ڤانییا ئه‌مریكا كۆمبوو.

دكۆمبوونا واندا ئه‌وا ل سه‌رۆكایه‌تییا هه‌رێما كوردستانێ هاتییه‌كرن، په‌یوه‌ندییێن هه‌رێما كوردستان و ئه‌مریكا، هه‌روه‌سا شه‌رێ داعشێ و چه‌ند بابه‌تێن دى هاتنه‌ گوتوبێژكرن، پشتى كۆمبوونێ ژى پرێسكۆنفرانسه‌كێ هه‌ڤپشك هاته‌ سازكرن.

وه‌زیرێ ده‌رڤه‌ یێ ئه‌مریكا كو ئه‌ڤرۆ حه‌فتى ئادارا 2023ێ ب سه‌رۆكایه‌تییا شانده‌كى گه‌هشته‌ عیراقێ، ل به‌غدا دگه‌ل محه‌مه‌د شیاع سوودانى سه‌رۆكوه‌زیرێن عیراقێ كۆمبوو و پاشان به‌ره‌ڤ هه‌ولێرێڤه‌ هات.

دپرێسكۆنفرانسی ژیدا پشتى كۆمبوونا دگه‌ل محه‌مه‌د شیاع سوودانى سه‌رۆكوه‌زیرێن عیراقێ، لۆید ئۆستن به‌حسا رۆلێ وه‌لاتێ خوه‌ ل شه‌رێ داعشێ كر، هه‌روه‌سا پشكه‌كا ئاخڤتنێن خوه‌ بۆ ڤه‌گه‌راندنا وه‌لاتییێن عیراقێ ( ئه‌وێن كو چه‌كدارێن داعشێ بوون یان كه‌سۆكارێن وان بوون ) ژ زیندانێن سووریا ته‌رخانكر.

وه‌زیرێ به‌ره‌ڤانییا ئه‌مریكا ل به‌غدا سه‌باره‌ت هاریكارییێن هێزێن وان ل شه‌رێ دژى داعشێ گوت: ب رێكا هه‌ڤپه‌یمانییا نێڤده‌وله‌تى بۆ ژناڤبرنا داعشێ، زێده‌تر ژ 50 هزار كیلۆمه‌ترێن چارگۆشه‌ ژ ده‌ستێ داعشێ هاتینه‌ قوورتالكرن، دگه‌ل ئازادكرنا زێده‌تر ژ چار ملیۆن و 500 هزار عیراقییان.

به‌حسێ هندێ ژى كر، ئه‌و بۆ ژناڤبرنا داعشێ دهه‌ماهه‌نگن و راگه‌هاند، هێزێن نیشتیمانى یێن عیراقێ دناڤدا هێزێن پێشمه‌رگه‌ى، پێنگاڤێن مه‌زن بۆ پێشخستنا شیانێن خوه‌ بۆ رووبرووبوونا تیرۆرێ هاڤێتینه‌، ئه‌ڤرۆ ژى ئه‌و دێ پێشره‌وبن، لێ كریارێن له‌شكه‌رى ب تنى تێرا هندێ ناكه‌ن داعش ب ئێكجارى ژ ناڤ بچیت.

ئه‌مریكا ب رێكا وه‌زیرێ به‌ره‌ڤانییێ دووپات دكه‌ت، هێزێن ئه‌مریكا د ئاماده‌نه‌ ل سه‌ر داخوازا حكومه‌تا عیراقێ ل عیراقێ بمینن و دبێژیت: ئه‌و هێزێن ژ چارچووڤێ هێزێن نه‌یێن شه‌ركه‌ر و رۆلێ شیره‌تكارى و هاریكارییا له‌شكه‌رى ماین، دێ بۆ هاریكاریكرنا هێزێن عیراقێ ل شه‌رى دژى تیرۆرێ مینن، ئه‌ڤه‌ ئه‌ركه‌كێ گرنگه‌ و ئه‌مریكا شانازیییێ دكه‌ت كو هاریكارییا عیراقا هه‌ڤپشكا خوه‌ بكه‌ت، لێ دڤێت ئه‌و ل جهه‌كێ سه‌قامگیر و سلامه‌ت كاربكه‌ن.