پەرلەمانتارەک:  چ رێگری ل دۆر پشکا ھەرێما كوردستانێ دناڤا بودجەیی دا نابن

ئاژانسا خانی ” تایبەت:

پەرلەمانتارەکێ پارتی ل بەغدا ئاشکرا کر، ل نێزیک دێ پڕۆژە قانوونا بودجه‌یێ گشتی یێ عێراقێ بۆ پەرلەمانی ھێتە ھنارتن و دبێژیت، ژبەر رێکكەفتنا ھاتییە کرن چ رێگری لسەر پشکا ھەرێما کوردستانێ دناڤا بودجەیی دا نابن.

شوان کەلاری، پەرلەمانتارێ فڕاکسیۆنا پارتی ل پەرلەمانێ عێراقێ بۆ ئاژانسا خانی دیار کر” بڕیارە سەرۆکاتییا جڤاتا وەزیرێن عێراقێ پڕۆژە قانوونا بودجەیی پەسەند بکەت و دھێتە چاڤەڕێکرن ئێکسەر بگەھیتە پەرلەمانی، بەری نوکە ژی رێکكەفتن ل سەر پڕۆژە قانوونا بودجەیی ل دەرڤەیی پەرلەمانی ھاتییە کرن و باوەر ناکەین چ ئاستەنگ ل سەر بودجەیی ھەبن” دەمێ خواندن بۆ دھێتە کرن، چونکی به‌ری نوكه‌ لایەنێن سیاسی رێکكەفتن ل سەر بودجەیی کرییە.

ل دۆر پشکا ھەرێما کوردستانێ ژی گۆت” پشکا ھەرێما کوردستانێ لدووڤ رێکكەفتنا دناڤبەرا شاندێ ھەرێما کوردستانێ و عێراقێ بوویە، مادەم رێکكەفتن ھاتییە کرن ئاریشە نامینن و کۆتلەیێن سەرەکی یێن پەرلەمانی دێ دەنگی بۆ پشکا ھەرێما کوردستانێ دناڤا پڕۆژە قانوونا بودجەیی بدەن، ئەگەر رێگری ھەبیت ئەڤە ب تنێ دێ ھژمارەکا زۆرا کێم یا پەرلەمانتاران بیت و کاریگەری ل سەر جێگیرکرنا پشکا ھەرێمێ نابیت.