بانكا سلیكۆن فالی ئیفلاسكر و راوێژكارێ دارایی یێ سەرۆک وەزیرێن عیراقێ، ئاشكرا دكەت پارەیێ عێراق ل بانکا فیدراڵییا ئەمریکی هاتییە دانان و دبێژت: ئیفلاسكرنا بانکا سیلیکۆن فالی یا ئەمریکی كارتێكرنا خوە ل سەر عیراقێ نابیت.
مەزهەر محەمەد ساڵح، ڕاوێژکارێ دارایی یێ سەرۆک وەزیرێن عیراقێ، ب ئاژانسا نووچەیا عیراقی ڕاگەهاند: “پرسا داڕمان و ئیفلاسكرنا بانکا سیلیکۆن فالی، ل ئەمریکا پەیوەندی ب قەڕان و بابەتێ بلندكرنا ڕێژەیا مفایێ بانكی هەیە ئاریشەكا ئاڵۆزە.”
ل دۆر مەترسی و کاریگەرییێن ئیفلاسبوونا بانکا ئەمریکی ل سەر عیراقێ، مەزهەرساڵح گۆت: “عیراق پارەیێن خوە ل وێ بانكێ نەدانایە و دۆلارێ عیراق ل بانکا فیدرالییا ئەمریکی هاتییە دانان.”
رەنگە هندەك وەبەرهێنەرێن عیراقی پارەیێن وان ل بانكا سیلیكۆن فالی هەبیت، لێ ڕاوێژكارێ سەرۆك وەزیرێن عیراقێ دبێژیت: “وەبەرهێنەرێن عیراقی ب هویری د چوارچۆڤێ رێكارێن توند ژلایێ بانکا ناڤەندییا عیراقێڤە وەبەرهێنانێ دکەن و ل دووڤ بەڵگەیێن وەبەرهێنانا ستاندارد ژ مەترسییێن جۆراوجۆر دهێنە دووركرن.”
چەند ڕۆژەكە بابەتێ ئیفلاسبوون و داڕمانا بانكا سیلیكۆن فالی بوویە باسێ میدیایێن ئەمریكا و جیهانێ و دەستهەڵاتا چاڤدێرییا بانکی یا ویلایەتێن ئێکگرتییێن ئەمریکا ژی چاڤدێرییا وێ بانكێ دكەت و دەستهەڵاتا بیمەیا وەبەرهێنانا فیدراڵی ژی رێكارێن خوە گرتینە بەر بۆ پاراستنا پارەیێ وەبەرهێنەرێن بچووک.
