ناڤه‌رۆكا پرێسكۆنفرانسێ مه‌سرور بارزانى و محه‌مه‌د شیاع سوودانى

پشتى كۆمبوونا سه‌رۆكێ حكومه‌تا هه‌رێما كوردستانێ و سه‌رۆكوه‌زیرێن عیراقێ، پرێسكۆنفرانسه‌ك هاته‌ سازكرن.

ل ده‌ستپێكێ محه‌مه‌د شیاع سوودانى ئاماژه‌ ب كاره‌ساتا كیمیابارانكرنا هه‌له‌بجه‌ كر و گوت: ئه‌و كاره‌ساته‌ هێشتا د ووژدانا عیراقییاندا مایه‌، و پێدڤییه‌ حكومه‌تا عیراقێ ژى به‌رامبه‌ر قوربانییێن ئه‌وێ كاره‌ساتێ پابه‌ندى به‌رپرسییارییان بیت، له‌وما دووهى جڤاتا وه‌زیرێن عیراقێ بریارا پارێزگه‌هبوونا هه‌به‌لجه‌ په‌سه‌ندكر.

دبه‌رامبه‌ر دا مه‌سرور بارزانى سه‌رۆكێ حكومه‌تا هه‌رێما كوردستانێ بخێرهاتنا سه‌رۆكوه‌زیرێن عیراقێ كر و ده‌ستخۆشی ل بریارا جڤاتا وه‌زیرێن عیراقێ بۆ فه‌رمى ناساندنا پارێزگه‌هبوونا هه‌له‌بجه‌ كر.

هه‌روه‌سا مه‌سرور بارزانى گوت : دوو رۆژێن دى، دێ كاره‌ساتا كیمیابارانكرنا هه‌له‌بجه‌ ل بیر ئینن، هیڤیداره ئه‌ڤ بریاره‌ ببیته‌ ده‌ستپێكه‌ك بۆ كێمكرنا ئازارێن خه‌لكێ هه‌له‌بجه‌.

سه‌باره‌ت په‌سه‌ندكرنا بودجه‌یا 2023ێ، سه‌رۆكێ حكومه‌تا هه‌رێما كوردستانێ راگه‌هاند، ده‌ستخۆشییێ ل سه‌رۆكوه‌زیرێن عیراقێ دكه‌ت و گوت: پیرۆزباهییێ ل هه‌موو عیراقییان ب گشتى بۆ په‌سه‌ندكرنا بودجه‌ى دكه‌ت، و هیڤیداره‌ جڤاتا نوونه‌ران ژى ئه‌وێ بودجه‌یێ په‌سه‌ند بكه‌ت كو دبه‌رژه‌وه‌ندییا هه‌موو خه‌لكێ عیراقێدایه‌.

سه‌رۆكێ حكومه‌تا هه‌رێما كوردستانێ ئاماژه‌ ب هندێ ژى كر، ژ چارچووڤێ ئه‌ڤێ بودجه‌یێ دشێن پێنگاڤێن دیژى بۆ چاره‌سه‌ركرنا خالێن دى وه‌كو قانوونا نه‌فت و غازێ پاڤێژن.

دپشكه‌كا دییا ئاخڤتناندا مه‌سرور بارزانى ئاشكراكر، دگه‌ل سه‌رۆكوه‌زیرێن عیراقێ به‌حسا میكانیزما بجهئینانا قانوونا بودجه‌ى وه‌كو خۆ كر، و دووپاتى ل هندێ كر، هه‌ردوو لایه‌ن دێ ل سه‌ر دانوستانن و هاریكاریكرنێ دبه‌رده‌وامبن.

ژلایێ خۆڤه‌ سه‌رۆكوه‌زیرێن عیراقێ سوپاسییا سه‌رۆكێ حكومه‌تا هه‌رێما كوردستانێ بۆ وێ پێشوازییا گه‌رم كر، و دووپاتكر، ئه‌وان پێنگاڤێن باش ل دانوستاندنێن دگه‌ل هه‌رێما كوردستانێ هاڤێته‌ و دێ ل سه‌ر دبه‌رده‌وام بن هه‌تا دگه‌هنه‌ چاره‌سه‌رییه‌كێ بۆ هه‌موو ئاریشه‌یان.

سه‌باره‌ت مادده‌یێ 140 یێ ده‌ستوورى، محه‌مه‌د شیاع سوودانى دیاركر، مادده‌یێ 140 پشكه‌كه‌ ژ رێككه‌ڤتنا سیاسییا دناڤبه‌را لایه‌ناندا و راگه‌هاند، بودجه‌یه‌ك بۆ بجهئینانا ئه‌وى مادده‌ی هاتییه‌ ته‌رخانكرن.