ئێڤاریا ئەڤرۆ چارشەمبی 14 ئادارا 2023 نێچیرڤان بارزانی ، سەرۆکێ ھەرێما کوردستانێ پێشوازی ل محەمەد شیاع سوودانی، سەرۆکوەزیرێن عیراقێ و شاندێ دگەلدا کر.
د کۆمبوونەکێدا پەیوەندییێن ھەولێر و بەغدا و دوماھی پێشڤەچوونێن دانوستاندنێن دناڤبەرا ھەردوو لایان دا گوتوبێژ کرن و دەربارەی ڕەوشا نوکە یا عیراقێ و ئاستەنگێن د ڕێکێ دا، ھزر و بوچوون لێکگۆھارتن.
سەرۆک نێچیرڤان بارزانی سوپاسی و پێزانینێن خۆ پێشکێشی سەرۆکوەزیرێن عیراقێ کرن بۆ تمامکرنا ڕێکارێن پارێزگەھکرنا ھەلبجە و پەسەندکرنا پڕۆژە یاسایا بودجەیا عیراقێ بۆ سێ سالێن داھاتی دا کو ل جڤاتا نوونەران دەنگ ل سەر بھێتە دان.
ھەر وەسا سەرۆکێ ھەرێمێ ھەمی ھاریکاریەک و پشتەڤانیەک بۆ سەرۆکوەزیرێن حکومەتا عیراقا فیدڕال دوپاتکر و ئەو کارێن تا نوکە د کارناما حکومەتێ دا بجھئیناین ب ئەرێنی و جھێ ئومێدەکا باش دەربڕین کرن.
ژ لایێ خۆ ڤە سەرۆکوەزیرێن عیراقێ پەسنا ڕولێ سەرۆک نێچیرڤان بارزانی د کۆمکرنا لایەنان و پەیوەندییێن وی یێن بھێز دگەل ھێز و لایەنێن سیاسی و پێکھاتەیێن عیراقێ و بزاڤ و پێنگاڤھاڤێتن بۆ تەبای و د ئێکگەھشتنێ کر.
محەمەد شیاع سوودانی دوپاتی ل سەر ئارامی و ئاسایش و پێشکەڤتنا عیراقێ ب ھەرێما کوردستانێ ڤە و پێکڤە گرێدانێ کر، بۆ ب پارێزگەھکرنا ھەلەبجە ژی ب خزمەتەکا بچووک زانی بەرامبەر ئەوان تاوانێن ل بەرامبەری ئەوی باژێری ھاتینە کرن.
ھەردوو لا ل سەر گرنگی و پێدڤییا تەبای و ئێکرێزییا دناڤبەرا ھێز و پێکھاتەیێن عیراقیان دا بۆ پاراستنا ئارامییا سیاسی یا وەلاتی و چارەسەرکرنا ئاریشەیێن دناڤبەرا ھەولێر و بەغدا دا ل سەر بنەمایێ دەستووری ھەڤڕا بوون، ھەر وەسا تەکەزی ل گرنگییا کەرتێ تایبەت و ڕۆلێ د پێشئێخستنا وەلاتی د ھەمی بواراندا کر.
پەیوەندییێن عیراق و ھەرێما کوردستانێ دگەل وەلاتێن جیران و دوماھی پێشھاتێن دەڤەرێ ب گشتی، تەوەرەکێ دی یێ کۆمبوونێ بوون.
