ل دەشتا نەینەوا گرۆپەک ل دژی فەرمانبەر و رێڤەبەرێن کورد کار دکەت

ئاژانسا خانی ” تایبەت:

نوونەرەکا دەشتا نەینەوا ل پەرلەمانێ عێراقێ ھۆشدارییێ لدۆر ھەبوونا گرۆپەکێ ددەت ل دەشتا نەینەوا و دبێژیت، ب پلان رێگری ل فەرمانبەرێن کورد ل تلکێفێ دھێتە کرن و دخوازن پێکڤە ژیانا دەڤەرێ بھێتە تێکدان و ئارامی نەمینیت.

کاڤین شێخ سەعید، پەرلەمانتارا پارتی ل بەغدا بۆ ئاژانسا خانی دیارکر” ھندەک کەسێن دیار سەر ب گرۆپەکێ چەکدارانڤه‌نه‌ ل دەشتا نەینەوا و ل قەزا تلکێف رەفتارێن نە بەرپرسانە ئەنجامداینە و بووینە ئەگەرێ تێکدانا ئارامییا دەڤەرێ، نابیت بھێتە قەبوولکرن ھندەک کەسێن چەکدار خوە بسەپینن ل سەر خەلکێ دەڤەرێ و ب خۆنیشاندانان دژایەتییا دام و دەزگەھێن حوکمەتێ بکەن، ئەو کەسێن ل دەشتا نەینەوا و تلکێفێ وەکو بەرپرسێن فەرمانگەھێن حوکمەتێ و رێڤەبەر كار دکەن رێگری لێ دھێتە کرن ئەڤە د دەمەکی دایە لدووڤ ده‌ستووری و قانوونێ ھاتینە دانان.

ناڤهاتییێ گۆت ژی” چەندین سالە پێكھاتێن دەڤەرێ بێ ئاریشە پێکڤە دژین و چو جاران ئەو دژایەتی نەبوویە، بەلێ مخابن گرۆپەکێ دیارکری پارە داینە و خەلکەکی ھانددەن دژی فەرمانبەرێن کورد ل تلکێفێ خۆنیشاندانێ بکەن، داخوازێ ژ سەرۆک وەزیرێن عێراقێ دکەین سنۆرەکی بۆ ھندەک گرۆپان دانیت و رێکێ نەدەت کەس ده‌ستێوەردانێ بکەن ل دەڤەرێ.ش