مه‌سرور بارزانى : سوودانى حه‌زه‌كا بهێز بۆ چاره‌سه‌ركرنا ئاریشه‌یان ل سه‌ر بنه‌مایێ ده‌ستوورى هه‌یه‌

جڤاتا وه‌زیرێن هه‌رێما كوردستانێ كۆمبوو و چه‌ند بابه‌ت گوتوبێژكرن، ژ وان ئه‌نجامێن سه‌ره‌دانا سه‌رۆكوه‌زیرێن فیدرال و پرۆژه‌ قانوونا بودجه‌ى.

ل دووڤ راگه‌هاندنا حكومه‌تا هه‌رێما كوردستانێ، مه‌سرور بارزانى سه‌رۆكوه‌زیرێن هه‌رێما كوردستانێ ئاماژه‌ ب هندێ دا، د كۆمبوونا دگه‌ل سه‌رۆكوه‌زیرێن عیراقێدا دانوستاندنه‌كا ئاشكرا ل دۆر چه‌ند ته‌وه‌ران هاته‌ كرن، و گوت ژى: وان وه‌سا هه‌ست پێ كر كو سه‌رۆكوه‌زیرێن عیراقێ حه‌زه‌كا بهێز بۆ چاره‌سه‌ركرنا ئاریشه‌یان ل سه‌ر بنه‌مایێن ده‌ستوورى و رێككه‌ڤتنا لایه‌نان بۆ پێكئینانا حكومه‌تێ هه‌یه‌.

دئێك ژ برگه‌یێن دى یێن كۆمبوونێدا به‌حسا په‌سه‌ندكرنا پرۆژه‌ قانوونا بودجه‌یا گشتییا عیراقێ ژلایێ شاندێ دانوستاندكارێ حكومه‌تا هه‌رێما كوردستانێڤه‌ هاته‌ كرن.

دڤى بیاڤیدا سه‌رۆكوه‌زیرێن هه‌رێما كوردستانێ دووپاتكر، كا چه‌وا هه‌ماهه‌نگییه‌كا باش ل ئاماده‌كرنا پارۆژه‌ قانوونا بودجه‌یا دناڤبه‌را حكومه‌تا هه‌رێمێ و حكومه‌تا فیدرالیدا هه‌بوو، پێدڤییه‌ بۆ بجهئینانا برگه‌یێن بودجه‌یێ ژى هه‌ماهه‌نگى و لێكتێگه‌هشتن دناڤبه‌را هه‌ردوو لایه‌ناندا هه‌بیت، داكو قانوونا بودجه‌ى ب باشى و درووستى و ب شێوه‌یه‌كى بهێته‌ بجهئینان كو د خزمه‌تا هه‌موو پێكهاته‌یێن عیراقێدا بیت