د سالڤەگەرا 35 سالیا كیمیابارانكرنا هەلەبجە دا سەرۆكێ هەرێما كوردستانێ پەیامەك بەلاڤكر.
دەقێ پەیاما سەرۆكێ هەرێمێ:
د سالڤەگەرا 35 سالیا تاوانا كیمیابارانكرنا هەلەبجەیا شەهید دا، ب رێزەكا مەزن ڤە یادا شەهیدان دكەین. سلاڤان ژبۆ گیانێ وان یێ پاك و بۆ خانەوادە و كەسوكارێن وان دهنێرین.
كیمیابارانكرنا هەلەبجە، موركا ریسوایی و شەرمزارییێ یە ب ناڤچاڤێن تاوانباران ڤە، ل جیهانێ ژی ناسنامە و گەواهییە بۆ ستەملێكرنا گەلێ كوردستانێ. د چەند خولەكەكان دا ژیان ژ پێنج هزار مروڤێن بێ تاوان و ژ سرۆشتی و هەمی تشتان ستاند. ب هزارەهان كەس ژی بریندار و دەربەدەركرن، لێ نەشیان ئیرادا گەلێ كورد بشكێنیت.
گەلێ كوردسانێ ب یادكرنا ئەوێ مەرگەساتێ، ل بیرا نەوەیێن ئەڤرۆ و هەمی جیهانێ دئینیت كا چ قۆربانی ل پێناڤی ئازادییێ داینە. هەروەسا جیهانێ و مرۆڤایەتییێ د ئێخیتە بەرامبەر ئەركەكێ ئەخلاقی و مرۆڤی كو هەمی بزاڤان بكەن ژبۆ وێ یەكێ تاوانەكا ب ڤی رەنگی ل چ جهان دوبارە نەبیت.
د ڤێ یادێ دا، سوپاسییا حكومەتا فیدرالی یا عیراقێ و هەمی لایەنێن پەیوەندیدار ل عیراقێ و هەرێمێ دكەین بۆ تەمامكرنا رێكارێن ب پارێزگەهكرنا هەلەبجە. دوپات ژی دكەین كو هەلەبجە و خەلكێ هەلەبجە ژ هەموو روویەكی ڤە پێدڤی ب خزمەتا زێدەترە. پێدڤییە كێمتەرخەمی نەهێتەكرن و وەك دادگەهێ و یاسایێ بریاردای، بهێنە قەرەبووكرن.
