حەشدا شەعبی ل پردێ پێنج پێشمەرگە دەستەسەرکرینە

ل ناحیا پردێ یا سەر ب پارێزگەها کەرکووکێ ڤە حەشدا شەعبی پێنچ پێشمەرگەیان دەستەسەر دکەت کو ب مەرەما سەرەدانکرنا بنگەهێ ساخلەمییێ قەستا وێ دەڤەرێ کریە.

 هێزێکا حەشدا شەعبی د ناڤ بازاڕێ پردێ و دەوروبەرا دا پێنج پێشمەرگە، سەرەڕای کو د بێ چەک ژی بوون و ب مەرەما سەرەدانا بنگەهێ ساخلەمییا پردێ سەرەدانا وێ دەڤەرێ کربوو، ژ لایێ هێزەکا حەشدا شەعبی ڤە هاتیە دەستەسەرکرن، پشتی دەمەکی ژ دەستەسەرکرنێ هاتینە ڤەگۆهاستن بۆ بنگەهێ پۆلیسێن پردێ.

ژێدەرێن ڕۆژنامەڤانی وەسا دیارکریە، پشتی ڤەکۆلینێ و بێ تاوانیا ئەوان پێنج پێشمەرگەیان ژ لایێ بنگەهێ پۆلیسانڤە هاتینە ئازادکرن، د پشتڕا هێزەکا بەرهەنگاربوونا تیرۆرێ جارەکا دی ب بهانەیا کو ساڵنامەیا تڕۆمبێلێ ب ناڤێ ئەوان نینە و بناڤێ بابێ ئێک ژ ئەوان پێشمەرگەیانە دوبارە هاتینە دەستەسەرکرنڤە.

هەر وەسا دیارکریە، پشتی مانا دوو دەمژمێران ل وی بنگەهی ژی هاتینە ئازادکرن، پاشی ژ لایێ فەوجەکا سوپایێ عیراقێ ڤە هاتینە دەستەسەرکرن و بۆ بارەگایێ فەوجا سێ یا سوپایێ عیراقێ ل پردێ هاتینە ڤەگۆهاسن.