د. نەوزاد هێتۆتی، مامۆستایێ زانستێن سییاسی ل زانکۆیا سەلاحەدین ل هەولێرێ، بۆ ئاژانسا خانی گۆت: ئەوا ل شنگالێ روودایی یارییەکا هەوالگێرییا ئیرانی و گرۆپێن میلیشیاتێن شیعی یێن سەر ب ئیرانێڤەنە و چ پەیوەندی ب ئێزدییانڤە نینە، ئیرانێ و گرۆپێن میلیشیاتان دڤێن ب رێیا بێرێزیکرنێ ب مزگەفتێ و جهێن پیرۆز و تۆمەتبارکرنا ئێزدییان کێشە و ناکوکییان دناڤبەرا پێکهاتێن ئایینی دا دروست بکەن و ب وی رەنگی پێگەهێ خۆ ل وێ دەڤەرێ ب هێز بکەن. دوور نینە ل چەند رۆژێن بهێن دا جهێن پیرۆز یێن کوردێن ئێزدی بهێنە سۆتن و کوردێن موسولمان بهێنە تۆمەتبار کرن.
ناڤهاتی گۆت ژی: د راستی دا ئیران یا شارەزایە، د دروست کرنا شەرێ تائیفی و ئایینی دا دناڤبەرا پێکهاتان دا، داکو درێژییێ ب هەژمۆن و سیاسەتا خۆ بدەت، هەروەسا ل دەمێ شەرێ تائیفی دناڤبەرا شیعا و سونییان دا، ل 2005 – 2008 ێ، ل سامەرا، ئیرانێ ب پەقاندنا چەندین جهێن پێروز یێن شیعان و تاوانبار کرنا سونییان شییا ئاگرێ شەری دناڤبەرا شیعا و سونییان دا خۆش بکەت، هەر ئەو شەرێ تائیفی بوویە فاکتەرێ هەرە گرنگ بۆ ب هێز کرنا پێگەھ و دەستهەلاتا ئیرانێ ل عێراقێ، دڤێت کورد، هەر ژ چ ئایینی و باوەری بن، گەلەک د هشیار بن و نەکەڤنە تەلها ئیرانێ و گرۆپێن حەشدا شیعی، دڤێت هەر دەزگەھ و کەسەک یان گرۆپەکێ بزاڤا دروست کرنا ناکوکییان بکەت ب توندترین شێوە بهێته سزادان.
