بێگەرد تالەبانی: ل گەل حکومەتا عێراقێ رێككه‌فتینه‌ بۆ دروستکرنا چەند بەنداڤێن نوو

وەزیرا چاندنێ و ژێده‌رێن ئاڤێ یا حکومەتا هەرێما كوردستانێ دبێژیت، ل گەل حکومەتا عێراقێ بۆ دروستکرنا چەند بەنداڤێن نوو ل هەرێما کوردستانێ گەهشتینە رێککەفتنێ و ئه‌ڤ ساله‌ وان ئاریشه‌ ل گەل حکومەتا عێراقێ نابیت بۆ وەرگرتنا گەنمی جۆتیارێن هەرێمێ.

ئەڤرۆ شەمبییێ، 6 ی گولانا 2023 ێ، ب سەرپەرشتییا محەمەد شیاع سوودانی، سەرۆک وەزیرێن عێراقێ کۆنفرانسێ سێیێ یێ نێڤدەولەتی یێ ئاڤێ ل بەغدا دەستپێکرد، ئه‌و کۆنفرانسه‌ ل ژێر دروشمێ (کێمییا ئاڤێ، هۆرێن دۆلا رافیدەین، ژینگەها شەتولعەرەب، بەرپرسیاره‌تییا هەموویان) دهێته‌ ساز كرن.

بێگەرد تالەبانی، وەزیرا چاندنێ و ژێده‌رێن ئاڤێ یا حکومەتا هەرێما کوردستانێ، ب سەرۆکاتییا شانده‌كێ پشكداری د وی کۆنفرانسی دا کرییه و گۆتییه‌” ژ ئه‌گه‌رێ گوهۆرینێن سه‌قایی‌، نوكه‌ بابەتێ ئاڤێ بوویه‌ ئاریشه‌كا نێڤدەولەتی و وه‌کرییە رێژا ئاڤی ل گه‌له‌ك وه‌لاتان، ب عێراق و هەرێما  کوردستانێڤە، رووبروو گوهۆرینێن سه‌قایی ببیت و كێم ببیت.