دامەزرێنەرێن بنگەهێ لالش شۆرەشەکا ڕەوشەنبیری کر

بنەفش شێخ عەلۆ

٣٠ سالە بنگەهێ لالشێ ل سەر درۆشمێ خۆ بەردەوامە ژ بۆ خزمەتا کوردستان و ئێزدییاتییێ کو دامەزرێنەرێن وێ شۆرەشەکا رەوشەنبیری د دەمەکێ زێڕین و زەحمەت دا کر و پێشڕەوێن دۆزا کوردی و ئێزدییاتییێ بوون ل ژێر درۆشمێ (لالش کانییەکا زەلالە دهۆرتە د رووبارێ رەوشەنبیرییا کوردی دا) ژ دامەزرێنەرێ سەرەکی یێن سالا ١٩٩٣ (پیر خدر سلێمان، شێخ عەلۆ خەلەف، شێخ شامۆ، شێخ زێدۆ، حاکم نەمر کەچۆ، عیدۆ باباشێخ، عادل ناسر، جەمیل خدر، محمود عیدۆ، حەسۆ نەرمۆ) گرنگە دەستەیا نوو یا بنگەهێ لالشێ خزمەتا وان ل بەر چاڤ وەربگرت و سلاڤ بۆ گیانێ ئەوێن چووین ل بەر رەحما خودێ.

هژمارەکا مەزن یا رەوشەنبیر و کەساتییێن ئێزدی دەرچوویێن ئەڤێ سازییا مەزنبوون، ئاڤاکرنا بنگەهێ لالشێ و سەرهلدانێ رۆلەکێ مەزن ژ چەندین ئالییان بۆ خزمەتا جڤاکا مە گێڕایە کو هەر ژ دەستپێکێ کارییە هزرا پاقژ یا ئێزدییاتییێ و رەوشەنبیرییا وێ د ناڤا کۆمەلگەها ئێزدی و جڤاکا کوردی ژی دا بەلاڤبکەت، پرەک بوویە ژبۆ لێکنزیکبوونا ئێزدییێن جیهانێ و بۆ جڤاکا کوردی ژی سەلماندییە ئێزدی کوردێن رەسەنن و هزرا تۆندڕەو کێمکرییە هەموو ئێزدی ژی لسەر ئەڤێ دیرۆکێ شاهدن.

‌‎بنگەهێ لالشێ دەرگەهەک بوویە ژ بۆ ل خوە خرڤەکرنا گەنج و رەوشەنبیرێن ئێزدی هەر بگرە ژ ئاڤاکرنا کەسایەتی، دیتنا دەلیڤەیێن کاری هەروەسا ب رێکا گۆڤار و رۆژنامەیێن وێ کارینە هزرێن خوە د ناڤا جڤاکی دا بەلاڤبکەن و ببن کەساتیێن بەرچاڤ و گەلەک ژ وان ئیرۆ رۆژ نموونەیێن هەرە دیارن.

‌‎گەر بەحسێ رۆلێ بنگەهێ لالشێ و پشکدارییا ژنێ بکەین ل ١٠ سالێن دەستپێکی یێن ئاڤاکرنا بنگەهی ل وی سەردەمی کچ و ژنێن ئێزدی ئەو ئازادییە نەبوو کو کار ژ دەرڤەیێ مالێ بکەت و دەنگێ خوە بگەهینیت، بنگەهێ لالشێ کاری ژنا ئێزدی ژ مال دەربێخت و بەرەف خوەڤە بکێشت و دەنگێ خوە بگەهینیت جڤاکا ناڤخۆ و ژ دەرڤەیێ وەلاتی ژی کو نموونە دزۆرن و ئیرۆ ژ وان سەرکردە هەنە و ب وێ رێکێ کارینە مافێن خوە وەربگرن، هەروەسا ئەز بخوە ئێک ژ وانم کو چەندین چالاکی ب هەڤکاری دگەل تایێن بنگەهێن لالشێ من کرینە، واتە هەموو گاڤا پشکدارییا ژنێ د بنگەهێ لالشێ دا هەبوویە و رێک دایێ یە ل داویێ ژی ئەز وەک کچەک و گەنجەک داخواز ژ ئەڤێ سازییا خودان دیرۆک دکەم دەرگەهێن وێ ل هەمبەر کیژا ئێزدی دڤەکری بن و نموونەیێن جڤاکا مە د زۆرن و دەستپێشخەر نەهێنە ژبیرکرن…