ل رۆژا چوارشەمبی رێكەڤتی ٢٤ـی گولانێ ٢٠٢٣، روینشتنەكا ڤەكری ژلایێ د. داود سلێمان ئەتروشی، سەرۆكێ زانكۆیا دھۆك، و د. لوقمان ھادی حەسەن، د. دلشاد عەبدولجەبار حەلیم، و د. نەبەز ئیبراھیم محەمەد، ھاریكارێن سەرۆكێ زانكۆیێ، بۆ سەرۆك پشكێن زانستی یێن كۆلیژێن زانكۆیا دھۆك و بەرپرسێن یەكەیێن خواندنا بلند ل سەنتەرێ كۆنفرانسا ھاتە ئەنجامدان.
د ڤێ روینشتنێ دا مژارێن سیاسەتا زمانی، پرۆسێسا پێشكێشكرنێ بۆ خواندنا بلند، پێڤاژۆیا بۆلۆنیا، سندۆقا پالپشتیا دراڤی بۆ مامۆستایێن زانكۆیا دھۆك، ھندەك مژارێن دی ھاتنە گەنگەشەكرن. د. دلشاد عەبدولجەبار پەیڤا دەستپێكێ پێشكێشكر و باس ل گرنگیا ئەنجامدانا ڤان روینشتنا ب شێوێ وەرزی كر، بۆ مفاروەرگرتنێ ژ ئێكودوو و ساخكرنا گیانێ کارکرنا ب تیم و پتر نێزیكبوون د ناڤبەرا سەرۆك پشك و جڤاتا زانكۆیێ دا، ژبەركو ھەردوو تمامكەرێن ئێكن و ب ھەڤكاری دێ زانكۆیێ بەرەڤ پێشڤە بەن.
ل دویڤ دا د. داود ئەتروشی، سەرۆكێ زانكۆیا دھۆك باس ل تەوەرێن سەرەكی یێن روینشتنێ كر. ل دەستپێكێ ئاماژە ب ئەوێ چەندێ دا، كو سەرۆك پشك بزوێنەرێن كارێ زانكۆیێ نە، لەورا یا گرنگە سەرۆكاتیا زانكۆیێ و سەرۆك پشك پێكڤە كاربكەن و بەردەوام د پەیوەندیێ دا بن. دیسان ناڤبری گۆت “ئەم سەركردێن خواندنا بلندن نەك رێڤەبەرین و ب تنێ رێنمایان بجهدئینین، پێدڤیە سەركردا ژی پرۆژێن نوی ھەبن، زانكۆ سازیەكا ئەكادیمی یا دینامیكی یە و پێدڤیە بەردەوام گوھۆرین و پێشڤەچوون تێدا بھێنەكرن”.
دیسان سەرۆكێ زانكۆیێ باس ل بوھایێن كاركرنێ ل زانكۆیا دھۆك كر و داخواز ژ سەرۆك پشكان كر، ل دەمێ كاركرنێ ئەڤ بوھایە ل بەرچاڤێن وان بن و د كارێ خۆ دا پەیرەوبكەن، داكو زانكۆ بەرەڤ پێشڤە بچیت و كار ب دروستی بھێنە ئەنجامدان، ئەوژی بوھایێن: یەكسانی، شەفافیەت، دەستپاكیا ئەكادیمی، رێزگرتن، نیشتیمان پەروەری.
ھەردیسان سەرۆكێ زانكۆیێ باس ل سیاسەتا حكومەتا ھەرێما كوردستانێ كر و دیاركر كو سیاسەتا زانكۆیا دھۆك پشكەكە ژ سیاسەتا حكومەتێ، ئەوژی سیاسەتا چاكسازیێ و پێشڤەبرنێ یە، دیسان باس ل پلانا ستراتیژی یا زانكۆیا دھۆك كر كو متمانە بەخشین و دلنیاییا جۆری بخۆڤەدگریت، كو ئارمانجا سەرەكی یا زانكۆیا دھۆك وەرگرتنا متمانێ یە. ھەروەسا سەرۆكێ زانكۆیێ باس ل سیاسەتا زانكۆیێ كر و دیاركر كو لیژنەك بۆ دارێژتنا سیاسەت و ستراتیژیا زانكۆیێ ژ ١٥ كەسان ب سەرۆكاتیا سەرۆكێ زانكۆیێ ھاتیە پێكئینان.
مژارا سیاسەتا زمانی ئێك ژ تەوەرێن دی یێن ڤێ روینشتنێ بوو، سەرۆكێ زانكۆیێ ب درێژی باس لێ کر و دیاركر كو ھندەك پرۆسێسێن نوی دێ ل سالا بھێت ھێنە ئەنجامدان، ئێك ژ وان ژی پرۆسێسا بجهئینانا سیاسەتا زمانی یە، ناڤبری دیاركر كو پێدڤیە بۆ ھەر بابەتەكێ خواندنێ ب تایبەتی ل كۆلیژێن زانستێن مرۆڤایەتی، زمانێ سەرەكی یێ خواندنێ بھێتە دەستنیشانكرن، ل گەل بەرچاڤ وەرگرتنا ژێدەرێن بابەتی، پاشخانا قوتابی و بەرژەوەندیا وی.
مژارەكا دی یا گەرم د ڤێ روینشتنێ دا، مژارا پێشكێشكرنێ بۆ خواندنا بنلد و تاقیكرنا شیانێن زانستی بوو، سەرۆكێ زانكۆیێ جەخت ل سەر چەسپاندنا بنەمایێن دادپەروەری و یەكسانیێ و شەفافیەتێ د پرۆسێسا پێشكێشكرنێ دا بۆ خواندنا بلند و پرۆسێسا دانانا پرسیارێن تاقیكرنا شیانێن زانستی كر و دیارکر “پێدڤیە سەرۆكێ پشكێ سەرپەرشتیا پرۆسێسێ بكەت، نەك پشكدار بیت، دیسان بابەتێ رێكخستنا دەواما مامۆستایێن زانكۆیێ، ل دویڤ سیستەمەكی كو دێ ژلایێ سەرۆك پشكان ڤە سەرپەرشتی ل سەر ھێتەكرن. دیسان سەرۆكێ زانكۆیێ باس ل پێڤاژۆیا بۆلۆنیا كر و ئەو ئاستەنگێن دكەڤنە بەرامبەر پەیرەوكرنا وێ و گرنگیا تێگەھشتنا رێنمایان ژ لایێ قوتابی و مامۆستایا ڤە.
هەر د ڤێ روینشتنێ دا، سەرۆکێ زانکۆیێ باس ل پرۆژێ سندۆقا پالپشتیا دراڤی بۆ مامۆستایێن زانكۆیا دھۆك کر، ئەڤ سندۆقە ب رێكا پشكداربوونا مامۆستایێن زانكۆیا دھۆك ب گوژمەكی ب شێوێ ھەیڤانە، د ھەژمارەكا بانكی دا ب ناڤێ زانكۆیێ دھێنە كۆمكرن و رێژا ٧٠٪ ژ داھاتێ سندۆقێ بۆ وان مامۆستایان دێ ھێتە خەرجكرن یێن كاودانەك ب سەر دا دھێت، كو پێدڤی ب ھاریكاریا دارایی بیت و رێكارێن خەرجكرنا گوژمەی ژ لایێ لیژنەكا تایبەت ڤە دھێنە ئەنجامدان، سەرۆكێ زانكۆیێ پشكداریا مامۆستایێن زانكۆیێ د ھاریكاریكرنا ھەڤدوو دا و ساخكرنا گیانێ ھاریكاریێ ب گرنگ نرخاند.
ل دویڤ دا دەلیڤە ب پشكدارێن دی یێن روینشتنێ ھاتە دان، كو ژ لایێ خۆڤە د. دلشاد عەبدولجەبار پرۆژێ سندۆقا پالپشتیا دراڤی ب ھویری بۆ ئامادەبوویان روھنكر، ل دویڤ دا د. لوقمان ھادی باس ل پرۆسێسا پێشكێشكرنێ بۆ خواندنا بلند كر و ل دویماھیێ د. نەبەز ئیبراھیم باس ل گۆرانكاریا د ئەركێن تۆمارێن كولیژا دا كر، كو بۆ سالا بھێت دێ ھندەك ئەركێن وان بۆ تۆمارا گشتی ھێنە ڤەگوھاستن، وەكو بارسڤككرنەك بۆ وان و پتر رێكخستنا كارێ تۆمارێ.
ل دویماھیا روینشتنێ دەرگەھێ پرسیار و دانوستاندنێ ھاتە ڤەكرن و سەرۆك پشك و بەرپرسێن یەكەیێن خواندنا بلند پرسیارێن خۆ ئاراستەی پشكدارێن روینشتنێ كرن و وان ژی ژ لایێ خۆڤە بەرسڤ ل سەر پرسیارێن وان دان و گەنگەشا تێبینی و سەرنج بۆچوونێن ئامادەبوویا ھاتەكرن
