ئاژانسا خانی:
پەرلەمانتارهكێ فراكسیۆنا پارتی دیموكراتی كوردستان ل پهرلهمانێ عیراقێ دیار کر، ژ ئهنجامێ وان گوهۆرینێن د پشکا ھەرێما کوردستانێ دا هاتینه كرن” پێشبینی دهێته كرن کۆمبوونا ھهڤپەیمانییا ئیدارەدانا دەولەتێ بهێته كرن و ئەو گوهۆرینێن د پشکا ھەرێما کوردستانێ دا هاتنیه کرن دێ هێنه چارەسەر کرن.
سیپان شێروانی، زێدهتر بۆ ئاژانسا خانی گۆت: ههتا نوكه چ دهم بۆ دەنگدانێ ل سەر پڕۆژە قانوونا بودجەیێ گشتییێ عێراقێ نههاتینه دیار کرن و ھەرێما کوردستانی پابەندی چ گوهۆرینان نابیت ل دەرڤهیی وی دەقێ پێشتر یێ حکومەتا عیراقێ رێککەفتن ل سەر هاتییه کرن، چونکی ھەر گوهۆرینهكا بهێته كرن دێ زیانێ گههینیته ھەرێمێ و بەغدا، گوهۆرین د مادێن 13 و 14 یێن بودجەیێ عێراقێ ئاریشە بۆ جێبەجێکرنا قانوونا بودجەیێ عێراقێ دروست كرییه.
ناڤهاتی گۆت ژی: هەرێما کوردستانێ د بزاڤێن بهردهوام دایه بۆ چارەسەرکرنا ئاستەنگێن ل ههمبهر پشکا ھەرێما کوردستانێ دناڤا قانوونا بودجەیی دا، چونکی پەرلەمان نهشێت سهدێ % وان مادان ب گوهۆریت یێن كو حکومەتێ هنارتین و پێشبینی دهێته كرن ل ڤان رۆژان دا ھهڤپەیمانییا ئیدارەدانا دەولهتێ كۆمبوونهكێ بكهت و پارتی ژی دێ پشكدارییێ تێدا كهت و پێشبینی دكهین ئهو ئاریشێن ههین بهێنه چارەسەر کرن.
سیپان شیروانی ئهو ژی گۆت: بابهتێ گوهۆرینا مادێن 13 و 14 چهند پرسهكا كوردستانی بیت هند پرسهكا عیراقێ ژییه” ئهوا هاتییه كرن كۆدهتایهك بوویه ل سهر حكومهتا سوودانی ژی” پهرلهمانتارێن شیعی و ئێكهتییێ پێكڤه ئهو مادێن قانوونا بودجهیی گۆهارتینه و ئهو كارێ وان ئهنجامدایی” بابهتهكێ نهیێ دهستوورییه و دڤێت ئالی یێن سییاسی یێن عیراقی بهێنه سهر خهت و ڤی بابهتی چارهسهر بكهن و ئهم ب هیڤینه ئهو ماده ههردو بهێنه گوهۆرین” چونكی ههكه نههێنه گوهۆرین دێ رهوشهكا خراب ل عیراقێ پهیدا بیت” ههروهسا ههموو كار ژ عهرهبێن شیعی دهێنه چاڤهرێكرن و دیسان پشتی سهرۆك وهزرێن عیراقێ محهمهد شییاع سوودانی نییهتهكا پاقژ نیشاندایی” عهرهبێن شیعی دڤییا كۆدهتایهكێ ل سهر حكومهتا وی و دیسان ههرێما كوردستانێ ژی بكهن” بهلێ ئهم ب هیڤینه ئهو كۆدهتایا وان سهرناگریت.
