عیراق دێ بۆریا سێیێ یا پەترۆلێ ب ڕێکا دەریایی ڕاکێشیت

ب مەرەما ڕاکێشانا بۆریا هنارتنا پەترۆلێ ب ڕێکا دەریایی، حکومەتا عیراقێ ڕازەمەندی ل سەر دابینکرنا 416 ملیۆن دۆلاران دیارکر.

ئەڤرۆ سێشەمبی، جڤاتا وەزیرێن عیراقێ کۆمبوو و چەند بڕیار دەرخستن، ئێک ژ وان بڕیاران ژی ڕازەمەندی ل سەر ڕاکێشانا سێیەم بۆڕیا پەترۆلێ ب ڕێکا دەریایی هاتە دان.

نڤیسینگەها ڕاگەهاندنا سەرۆکوەزیرێن عیراقێ ئاماژە کریە، کۆمپانیا پەترۆلا بەسرا یا سەر ب حکومەتا عیراقێ ڤە گرێبەست دگەل کۆمپانیا ڕۆیاڵ بوسکالیس یا هۆڵەندی ئەنجامدایە بۆ ڕاکێشانا ئەوێ بۆرییێ.

دیارکریە ژی، ل گۆرەی وێ پلانا هاتیە دانان ڕۆژانە ئێک ملیۆن بەڕمیلێن پەترۆلا خاڤ دێ بۆ دەرڤە هێنە هنارتن.

ئاشکرا کریە، د پشکەکا دی یا کۆمبوونا جڤاتا وەزیرێن عیراقێدا ڕازەمەند ل سەر دامەزراندنا پڕۆژەیێ وزەیا ڕۆژێ ب بهایێ 520 ملیۆن دۆلاران هاتە دان کو دگەل کۆمپانیەکا چینی ل باشوورێ عیراقێ 750 مێگاواتێن کارەبێ بەرهەم بینیت.