پەرلەمان ناچیتە بھێنڤەدانێ ھەتا پرۆژه‌ قانوونا بودجێ عیراقێ نەھێتە پەسەند کرن

ئاژانسا خانی ” تایبەت:

پەرلەمانتارەکێ ئاشکرا کر، وەرزێ بھێنڤەدانا پەرلەمانێ عێراقێ دەستپێکرییە، بەلێ پەرلەمان ناچیتە بھێنڤەدانێ ھەتا پڕۆژە قانوونا بودجێ عێراقێ نەھێتە پەسەند کرن.

سیپان شێروانی، پەرلەمانتارێ پارتی ل پەرلەمانێ عێراقێ بۆ ئاژانسا خانی دیار کر” دانوستاندن د بەردەوامن لدۆر پڕۆژە قانوونا بودجێ گشتییێ عێراقێ، ب تایبەتی ل سەر ھەردو مادێن گرێدایی ھەرێما کوردستانێ، بەلێ دیارە ھەتا نوکە ئەنجامێن دووماھییێ نینن و لێک تێگەھشتن ھەیە ل سه‌ر وان مادێن حوکمەتێ داینە پەرلەمانی كو بھێنە پەسەند کرن.

ناڤهاتی گۆت ژی” راستە وەرزێ بھێنڤەدانا پەرلەمانی دەستپێکرییە، بەلێ پەرلەمان ناچیتە بھێنڤەدانێ ھەتا پڕۆژە قانوونا بودجەیی نەھێتە پەسەند کرن، لدووڤ قانوونێ ژی دەمێ  پڕۆژە قانوونا بودجەیی ل پەرلەمانی بیت بھێنڤەدان نینە، چونکی پڕۆژە قانوونا بودجەیی گرێدایی ژیانا خەلکییە و بەری نوکە ژی پەرلەمانی بڕیاردایە نەچیتە بھێنڤەدانێ.